ପୁରୀ: ଓଡ଼ିଶାରେ ମଦ ବିରୋଧୀ ଆନ୍ଦୋଳନକୁ ଅଧିକ ସକ୍ରିୟ କରିବ ମହିଳା ବାହିନୀ। ଏଥିପାଇଁ ୨୫ହଜାର ମହିଳାଙ୍କୁ ସଂଗଠିତ କରାଯାଇଛି। ମା’ଘର ଫାଉଣ୍ଡେସନ ଟ୍ରଷ୍ଟ ସଭାନେତ୍ରୀ ଋତୁପର୍ଣ୍ଣା ମହାନ୍ତି ଏ ସମ୍ପର୍କରେ ସୂଚନା ଦେଇଛନ୍ତି। ନିର୍ବାଚନ ପୂର୍ବରୁ ‘ମଦ ବନ୍ଦ କରିବ ଯିଏ, ମହିଳା ଭୋଟ ପାଇବ ସିଏ’ ସ୍ଲୋଗାନ ଦିଆଯାଇଛି। ୩ଦିନ ଧରି ପୁରୀ ୟୁଥ୍ ହଷ୍ଟେଲରେ ରାଜ୍ୟସ୍ତରୀୟ ଚିନ୍ତନ ଶିବିର ଅନୁଷ୍ଠିତ ହୋଇଛି। ୩୦ଟି ଜିଲାରେ ମଦ ବିରୋଧୀ ଆନ୍ଦୋଳନ ପାଇଁ ସେଥିରେ ସ୍ଥିର କରାଯାଇଛି।
ମଦ ପ୍ରସାର ଯୋଗୁଁ ମହିଳାଙ୍କ ଉପରେ ହିଂସା ଏବଂ ଅସାମାଜିକ କାର୍ଯ୍ୟକଳାପ ବୃଦ୍ଧି ପାଉଥିବା ଶ୍ରୀମତୀ ମହାନ୍ତି ସାମ୍ବାଦିକ ସମ୍ମିଳନୀରେ ପ୍ରକାଶ କରିଛନ୍ତି। ଲୋକସଭା, ରାଜ୍ୟସଭା ଏବଂ ବିଧାନସଭା ନିର୍ବାଚନରେ ରାଜନୈତିକ ଦଳ ଗୁଡିକ ମହିଳାଙ୍କୁ ୫୦% ଟିକେଟ ଦେବାକୁ ସେ ଦାବି କରିଛନ୍ତି। ୧୯୫୬ରେ ତତ୍କାଳୀନ ମୁଖ୍ୟମନ୍ତ୍ରୀ ନବକୃଷ୍ଣ ଚୌଧୁରୀଙ୍କ ଦ୍ୱାରା ପ୍ରଣୀତ ନିଶା ନିବାରଣ ଆଇନକୁ ରାଜ୍ୟ ସରକାର ତୁରନ୍ତ କାର୍ଯ୍ୟକାରୀ କରିବାକୁ ମା’ଘର ଫାଉଣ୍ଡେସନ ଟ୍ରଷ୍ଟ ଦାବି କରିଛି।
