ମୁମ୍ବଇ: ସୁପ୍ରିମକୋର୍ଟଙ୍କ ଐତିହାସିକ ରାୟ ଆଧାରରେ ମୋବାଇଲ ନଂରୁ ଆଧାର ନଂ ଡି ଲିଙ୍କ କରିବା ପାଇଁ ଭାରତୀୟ ସ୍ୱତନ୍ତ୍ର ପରିଚୟ ପତ୍ର ପ୍ରାଧିକରଣ (ୟୁଆଇଡିଏଆଇ) ପ୍ରକ୍ରିୟା ଆରମ୍ଭ କରିଛନ୍ତି। ଅକ୍ଟୋବର ୧୫ ତାରିଖ ସୁଦ୍ଧା ଆଧାର ଭିତ୍ତିକ ସ୍ୱୀକୃତି ପଦ୍ଧତି ଅପସାରଣ ପାଇଁ ଯୋଜନା ଦାଖଲ କରିବାକୁ ୟୁଆଇଡିଏଆଇ ସମସ୍ତ ଟେଲିକମ୍ କମ୍ପାନୀଙ୍କୁ ନିର୍ଦେଶ ଦେଇଛନ୍ତି କିନ୍ତୁ ଏହି ସମୟ ସୀମା ମଧ୍ୟରେ ଟେଲକମ୍ କମ୍ପାନୀମାନେ ଏହି ଲକ୍ଷ୍ୟ ପୂରଣ କରିପାରିବେ ନାହିଁ ବୋଲି କହିଛନ୍ତି।
ଏ ସମ୍ପର୍କରେ ଟେଲିକମ୍ କମ୍ପାନୀ ପକ୍ଷରୁ କୁହାଯାଇଛି ଯେ ଆଧାର ଡି ଲିଙ୍କ ପ୍ରକ୍ରିୟା ଆରମ୍ଭ କରିବା ପାଇଁ ଟେଲିକମ୍ ମନ୍ତ୍ରାଳୟ ପକ୍ଷରୁ କୌଣସି ନିର୍ଦେଶ ଆସିନାହିଁ। ସିମ୍-ଆଧାର ଡି ଲିଙ୍କ ନ ହେଲେ ଅଦାଲତ ଅବମାନନା ଅଭିଯୋଗ ଆସିବାର ଆଶଙ୍କା ଥିବାରୁ ଯେତେଶୀଘ୍ର ସମ୍ଭବ ଟେଲିକମ୍ କମ୍ପାନୀମାନେ ଆଧାର ଡିଲିଙ୍କ ଯୋଜନା କାର୍ଯ୍ୟକାରୀ କରିବାକୁ ୟୁଆଇଡିଏଆଇ ଚାପ ସୃଷ୍ଟି କରୁଛି। ଅପରପକ୍ଷରେ ଟେଲିକମ୍ କମ୍ପାନୀଙ୍କ ହାର୍ଡଡିସ୍କରେ ରହିଥିବା ଉପଭୋକ୍ତାଙ୍କ ଆଧାର ଭିତ୍ତିକ ତଥ୍ୟ ଡିଲିଟ ହେଲା କି ନାହିଁ ଏବଂ ଡିଲିଟ ହେବା ପରେ ଉପଭୋକ୍ତାଙ୍କ ପରିଚୟ ଓ ଠିକଣା ପୁଣି କେମିତି ସଂଗୃହୀତ ହେବ ତାହାକୁ ନେଇ ଏ ପର୍ଯ୍ୟନ୍ତ କୌଣସି ସ୍ପଷ୍ଟ ନିର୍ଦେଶନାମା ଆସିନଥିବାରୁ ଟେଲିକମ୍ କମ୍ପାନୀମାନେ ଅଡ଼ୁଆରେ ପଡ଼ିଛନ୍ତି। ଦେଶର ୫୦ କୋଟି ଟେଲିକମ୍ ଉପଭୋକ୍ତାଙ୍କ ମଧ୍ୟରୁ ୫୦% ଆଧାର ସହିତ ସିମ୍ ସଂଯୋଗ କରିଥିବା ବେଳେ ସେମାନଙ୍କର ସିମ୍ରୁ ଆଧାର ଡି ଲିଙ୍କ ଏକ ବିଳମ୍ବିତ ପ୍ରକ୍ରିୟା ବୋଲି ବିଶେଷଜ୍ଞମାନେ କହିଛନ୍ତି।
