ମୁମ୍ୱାଇ: ବରୁଣ ଧାଓ୍ୱନ ଏବଂ ସାରା ଅଲ୍ଲି ଖାନଙ୍କ ଅଭିନୀତ ଆଗାମୀ ଚଳଚ୍ଚିତ୍ର ‘କୁଲି ନମ୍ୱର -୧’ର ପ୍ରଥମ ଭାଗ ଶୁଟିଂ ଶେଷ ହୋଇଛି । ନିକଟରେ ‘କୁଲି ନମ୍ୱର -୧’ର ଟିମ୍ ପ୍ଲାଷ୍ଟିକ ମୁକ୍ତ ହେବା ନେଇ ବରୁଣ ସାମାଜିକ ଗଣମାଧ୍ୟମରେ ଏକ ଫଟୋ ଶୋୟାର କରିଥିଲେ । ଏବେ ପ୍ରଧାନମନ୍ତ୍ରୀ ମୋଦୀ ଏହି ଫଟୋ ଦେଖି ସମ୍ପୂର୍ଣ୍ଣ ଟିମର ଭୁରିଭୁରି ପ୍ରଶଂସା କରିଛନ୍ତି। ଦେଶକୁ ପ୍ଲାଷ୍ଟିକ ମୁକ୍ତ କରିବା ପାଇଁ ଟିମର ଏହା ଏକ ପ୍ରଶଂସନୀୟ ପଦକ୍ଷେପ ବୋଲି ମୋଦୀ ଟ୍ୱିଟ୍ କରି କହିଛନ୍ତି ।
ସୂଚନା ଅନୁସାରେ, ନିକଟରେ ବରୁଣ କୁଲି ନମ୍ୱର -୧ ଟିମ ସହ ସାମାଜିକ ଗଣମାଧ୍ୟମରେ ଏକ ଫଟୋ ଶେୟାର କରିଥିଲେ । ଯେଉଁଥିରେ ଦେଶକୁ ପ୍ଲାଷ୍ଟିକମୁକ୍ତ କରିବାପାଇଁ ଲୋକଙ୍କୁ ସଚେତନ କରାଇବା ଉଦ୍ଦେଶ୍ୟରେ ଟିମର ସମସ୍ତ ସଦସ୍ୟ ପ୍ଲାଷ୍ଟିକ ବୋତଲ ପରିବର୍ତ୍ତେ ଷ୍ଟିଲର ବୋତଲ ଧରିଥିବା ଦେଖିବାକୁ ମିଳିଛି । ଟିମର ଏହି ପଦକ୍ଷେପକୁ ଅନେକ ଲୋକ ପ୍ରଶଂସା କରିବା ସହ ମୋଦୀ ମଧ୍ୟ ଟିମର ପ୍ରଶଂସାରେ ଶତମୁଖ ହୋଇଛନ୍ତି।
