କୁଚିଣ୍ଡା-କୁଚିଣ୍ଡା ଉପଖଣ୍ଡୀୟ ସରକାରୀ ଡାକ୍ତରଖାନାରେ ଗତକାଲି ବିଳମ୍ବିତ ରାତ୍ରରେ ଜନୈକ ଯୁବକ ଉନ୍ମତ କାଣ୍ଡ ଭିଆଇବା ସହ ଦାୟିତ୍ୱରେ ଥିବା ଡାକ୍ତରଙ୍କୁ ମାରିବାକୁ ଉଦ୍ୟମ କରୁଥିବାର ଅଭିଯୋଗ ହୋଇଛି। ଏହି ଘଟଣାକୁ ନେଇ ଆଜି ଡାକ୍ତରଖାନାରେ ତୀବ୍ର ପ୍ରତିକ୍ରhୟା ପ୍ରକାଶ ପାଇଥିବା ବେଳେ ପୁଲିସ କଠୋର କାର୍ଯ୍ୟାନୁଷ୍ଠାନ ସହ ୨୪ଘଣ୍ଟା ମଧ୍ୟରେ ଗିରଫ ନକଲେ ଆନ୍ଦୋଳନ କରିବାକୁ ଚେତାବନୀ ଦେଇଛନ୍ତି ।
ଅଭିଯୋଗ ଅନୁସାରେ କୁଚିଣ୍ଡା ଉପଖଣ୍ଡୀୟ ଡାକ୍ତରଖାନାରେ ଗତରାତ୍ରରେ ଡା. ପଦ୍ମଲୋଚନ ମହନ୍ତ ରାତ୍ର ସେବା ଦାୟିତ୍ୱରେ ଥିଲେ। ବିଳମ୍ବିତ ରାତ୍ରରେ କିରା ଗ୍ରାମର ସୁକାନ୍ତ ମହାପାତ୍ର ନାମକ ଯୁବକ ଅଶାଳୀନ ଭାବେ ଗାଳିଗୁଲଜ କରିବା ସହ ମାରିବାକୁ ଉଦ୍ୟମ କରିଥିଲା। ଭୟରେ ଡାକ୍ତର ଉପସ୍ଥିତ ବୁଦ୍ଧି ଲଗାଇ ରକ୍ଷା ପାଇ ଯାଇଥିବା ପ୍ରକାଶ। ଏହି ଘଟଣାକୁ ନେଇ ଆଜି ହସପିଟାଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ଉପଖଣ୍ଡ ଚିକିତ୍ସା ଅଧିକାରୀ ଦାୟିତ୍ୱରେ ଥିବା ଡାକ୍ତର କ୍ଷେତ୍ରମୋହନ ଙ୍କ ଅଧ୍ୟକ୍ଷତାରେ ଏକ ସଭା ଅନୁଷ୍ଠିତ ହୋଇଥିଲା। ରୋଗୀଙ୍କୁ ନିରନ୍ତର ସେବା ଦେଉଥିବା ଡାକ୍ତରଙ୍କ ପ୍ରତି ଏତାଦୃଶା ବ୍ୟବହାର ଓ ଆକ୍ରମଣ ଉଦ୍ୟମ ଯୋଗୁଁ ତୀବ୍ର ଉଦବେଗ ପ୍ରକାଶ କରି ଏହାର ନିନ୍ଦା କରିଥିଲେ। ଏସଂକ୍ରାନ୍ତରେ କୁଚିଣ୍ଡା ପୁଲିସ ସମେତ ତାଙ୍କ କର୍ତ୍ତୃପକ୍ଷ ଓ ସଂଘକୁ ଲିଖିତ ଭାବେ ଅବଗତ କରି ଆଗାମୀ ୨୪ଘଂଟା ମଧ୍ୟରେ ଅଭିଯୁକ୍ତକୁ ଗିରଫ ନକଲେ ସେମାନେ କାର୍ଯ୍ୟବନ୍ଦ ଆନ୍ଦୋଳନ କରିବେ ବୋଲି ଚେତାବନୀ ଦେଇଥିବା ଜଣାଯାଇଛି। ଅନ୍ୟପକ୍ଷେ କୁଚିଣ୍ଡା ଥାନା ଅଧିକାରୀ କମଲ ପଣ୍ଡା ଏଦିଗରେ ସେ ପଦକ୍ଷେପ ନେଉଥିବା ସୂଚନା ଦେଇଛନ୍ତି।
Comments are closed.