କାଚ ଦ୍ୱାରା ବନ୍ଦ ଶୀତତାପ ନିୟନ୍ତ୍ରିତ ଘର ଅବା କାର୍ଯ୍ୟାଳୟ ଆରାମଦାୟକ ଅନୁଭବ ଦେଇଥାଏ, ମାତ୍ର ଏହା ଆପଣଙ୍କୁ ରୋଗାଗ୍ରସ୍ତ କରିପାରେ । ଆଧୁନିକ ଜୀବନଶୈଳୀର ପ୍ରତୀକ ବୋଲି କୁହାଯାଉଥିବା ଏପରି ଗୃହ କିମ୍ବା କାର୍ଯ୍ୟାଳୟକୁ ମୁକ୍ତ ବାୟୁ ଚଳାଚଳ କରିପାରି ନ ଥାଏ । ଏଥିସହ ସୂର୍ଯ୍ୟ କିରଣ ମଧ୍ୟ ପ୍ରବେଶ କରି ପାରି ନ ଥାଏ । ଫଳରେ ଶରୀରରେ ଭିଟାମିନ ଡି ମାତ୍ରା ହ୍ରାସ ପାଇବା ଯୋଗୁ ଅସ୍ଥି ଦୁର୍ବଳ ହୋଇଯାଇଥାଏ । ନୂଆଦିଲ୍ଲୀସ୍ଥିତ ଇନ୍ଦ୍ରପ୍ରସ୍ଥ ଆପୋଲ ହସ୍ପିଟାଲର ବରିଷ୍ଠ ଅସ୍ଥି ଅସ୍ତ୍ରୋପଚାର ବିଶେଷଜ୍ଞ ଡା. ରାଜୁ ବୈଶ୍ୟ ଦେଶର ବିଭିନ୍ନ ସହରରେ ଆଣ୍ଠୁଗଣ୍ଠି ଜନିତ ସମସ୍ୟା ଭୋଗୁଥିବା ୧ ହଜାର ରୋଗୀଙ୍କ ଉପରେ ଅଧ୍ୟୟନ କରି ଏହି ତଥ୍ୟ ଦେଇଛନ୍ତି । ଏହି ସମସ୍ତ ରୋଗୀଙ୍କ ମଧ୍ୟରୁ ୯୫ ପ୍ରତିଶତ ଲୋକଙ୍କଠାରେ ଭିଟାମିନ ଡି ମାତ୍ରା ହ୍ରାସ ପାଇଥିବା ଜଣାପଡ଼ିଥିଲା । ଏହାର ମୁଖ୍ୟ କାରଣ ହେଉଛି ପର୍ଯ୍ୟାପ୍ତ ସୂର୍ଯ୍ୟ କିରଣ ନ ପାଇବା । ଭିଟାମିନ ଡି ପାଇବାର ମୁଖ୍ୟ ସ୍ରୋତ ହେଉଛି ସୂର୍ଯ୍ୟ କିରଣ । ଏଥିସହ ପାଚନ ପ୍ରକ୍ରିୟାରେ ମଧ୍ୟ ଭିଟାମିନ ଡି ବହୁତ ଉପଯୋଗୀ ।
ବ୍ୟସ୍ତ ଜୀବନଚର୍ଯ୍ୟା ଓ ଆଧୁନିକ ଜୀବନଶୈଳୀ କାରଣରୁ ଲୋକେ ଆଉ ଟିକିଏ ଟାଣ ଖରା ସହ୍ୟ କରିପାରୁନାହାନ୍ତି । ବ୍ୟସ୍ତତା ଯୋଗୁ ଖୋଲା ସ୍ଥାନରେ ବୁଲାଚଲା ଓ ଖେଳକୁଦ ମଧ୍ୟ ଲୋକେ କରୁନାହାନ୍ତି । ତେଣୁ ଏହି କାରଣରୁ ଖରାରୁ ମିଳିବାକୁ ଥିବା ଭିଟାମିନ ଡି ମିଳିପାରୁନି । ଯଦିବା କେବେ ଆଣ୍ଠୁଗଣ୍ଠି ଯନ୍ତ୍ରଣା ହୁଏ, ଆମକୁ ଲାଗେ କ୍ୟାଲସିୟମ ଅଭାବବୋଧ, ମାତ୍ର ଭିଟାମିନ ଡି ମାତ୍ରା କମ୍ ହେବା ନେଇ ଆମେ ଧ୍ୟାନ ଦେଇନଥାଉ । ବିଶେଷଜ୍ଞଙ୍କ କହିବାନୁସାରେ, କ୍ୟାଲସିୟମ ସହ ଭିଟାମିନ ଡି ପରୀକ୍ଷା କରାଇବା ଜରୁରୀ । ଡାକ୍ତରଙ୍କ ପରାମର୍ଶ ଅନୁଯାୟୀ ଖାଦ୍ୟ ସହ କ୍ୟାଲସିୟମ ନେବା, ଘରକୁ ମୁକ୍ତ ବାୟୁ ଓ ସୂର୍ଯ୍ୟକିରଣ ପ୍ରବେଶ ପାଇଁ ବ୍ୟବସ୍ଥା କରାଯିବା ଉଚିତ ।
