ଇନ୍ଦ୍ରାବତୀରେ କଂଗ୍ରେସର ୧୨ ଘଣ୍ଟିଆ ବନ୍ଦ

ଇନ୍ଦ୍ରାବତୀ, ଇନ୍ଦ୍ରାବତୀ ଜଳଭଣ୍ଡାର ଦ୍ୱାରା ବାସଚ୍ୟୁତଙ୍କୁ ମୌଳିକ ସୁବିଧା ଯୋଗାଇ ଦେବା ଓ ଜଳଭଣ୍ଡାର ଜଳକୁ ଅନ୍ୟାନ୍ୟ ଅଞ୍ଚଳର କୃଷି ପାଇଁ ଯୋଗାଇବା ଆଦି ୫ ଦଫା ଦାବିରେ ନବରଙ୍ଗପୁର ଜିଲା କଂଗ୍ରେସ ଶାଖା ପକ୍ଷରୁ ଆହୂତ ଇନ୍ଦ୍ରାବତୀ ବନ୍ଦ ଡାକରା ଦ୍ୱିତୀୟ ଦିନରେ ପହଞ୍ଚିଛି। ଜିଲା କଂଗ୍ରେସ ସଭାପତି ମନୋରଞ୍ଜନ ତ୍ରିପାଠୀ, ପୂର୍ବତନ ସାଂସଦ ପ୍ରଦୀପ ମାଝୀ, ଜିଲା ମହିଳା କଂଗ୍ରେସ ସଭାନେତ୍ରୀ ପି ନାଗରତ୍ନାମା, ପୂର୍ବତନ ବିଧାୟକ ତଥା ଜିଲା କଂଗ୍ରେସ ଉପସଭାପତି ସଦନ ନାୟକଙ୍କ ସମେତ ଅନ୍ୟାନ୍ୟ ବ୍ଲକ୍‍ ସଭାପତି, ବରିଷ୍ଠ ନେତା ଓ କର୍ମୀମାନେ ପ୍ରକଳ୍ପ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଛନ୍ତି। ବନ୍ଦ ଡାକରା ଯୋଗୁଁ ଆଜି ସମସ୍ତ ସରକାରୀ କାର୍ଯ୍ୟାଳୟ ସମେତ ବ୍ୟାଙ୍କ, ଡାକଘର, ଶିକ୍ଷାନୁଷ୍ଠାନ, ବ୍ୟବସାୟିକ ପ୍ରତିଷ୍ଠାନ ଓ ବସ ଚଳାଚଳ ବନ୍ଦ ରହିଥିଲା। ନବରଙ୍ଗପୁର ଜିଲାପାଳ ଡ. ଅଜିତ କୁମାର ମିଶ୍ରଙ୍କ ନିର୍ଦେଶକ୍ରମେ ତେନ୍ତୁଳିଖୁଣ୍ଟ ତହସିଲ୍‍ଦାର ଦେବେନ୍ଦ୍ର ବାହାଦୂର ସିଂହ ଧାରୁଆ ଓ ଅତିରିକ୍ତ ତହସିଲଦାର ରାମଗୋବିନ୍ଦ ପରିଡ଼ା ଆନ୍ଦୋଳନକାରୀଙ୍କ ସହିତ ଆଲୋଚନା କରିଥିଲେ। ଆସନ୍ତା କାଲି ସମସ୍ତ ବିଭାଗୀୟ ଅଧିକାରୀଙ୍କୁ ନେଇ ଏକ ବୈଠକ ଅନୁଷ୍ଠିତ ହେବ ବୋଲି ପ୍ରତିଶ୍ରୁତି ଦିଆଯାଇଛି। ଅପରପକ୍ଷରେ୧୫ ଦିନ ମଧ୍ୟରେ ଦାବି ପୂରଣ ନ ହେଲେ ଆନ୍ଦୋଳନ ଜୋରଦାର କରାଯିବ ବୋଲି ଜିଲା କଂଗ୍ରେସ ପକ୍ଷରୁ କୁହାଯାଇଛି।