ଦକ୍ଷିଣ କୋରିଆ: ବର୍ତ୍ତମାନ ଇଣ୍ଟରନେଟ୍ ସହାୟତା ନେଇ କେଉଁ ରେସ୍ତୋରାଁ ଖାଦ୍ୟ ଭଲ, ଦୋକାନକୁ ରାସ୍ତା କେଉଁଠି, ନୂଆ ଜିନିଷ କ’ଣ ମିଳୁଛି ଆଦି ତଥ୍ୟ ଅତି ସହଜରେ ମିଳିଯାଉଛି। ଜଣାଶୁଣା ୟୁ-ଟ୍ୟୁବର୍ମାନେ ମଧ୍ୟ ରେସ୍ତୋରାଁ ଖାଦ୍ୟ ବିଷୟରେ ମତାମତ ଅନ୍-ଲାଇନ୍ ଦେବା ପରେ ସାଧାରଣ ଲୋକମାନେ ସେହି ଅନୁସାରେ ସେଠୁ ଖାଦ୍ୟ ମଗାଇବେ କିମ୍ବା ନାହିଁ, ନିଷ୍ପତ୍ତି ନେଉଛନ୍ତି।
୨୦୨୧ରେ ଦକ୍ଷିଣ କୋରିଆସ୍ଥିତ ଏକ ରେସ୍ତୋରାଁରେ ଜଣେ ନାମୀ ୟୁ-ଟ୍ୟୁବର୍ ବିବାଦୀୟ ମନ୍ତବ୍ୟ ଦେଇଥିଲେ। ସେହି ପଞ୍ଚତାରକା ରେସ୍ତୋରାଁ ସ୍ଥାନୀୟ ଅଞ୍ଚଳରେ ଖୁବ୍ ଲୋକପ୍ରିୟ ଥିଲା କିନ୍ତୁ ୟୁ-ଟ୍ୟୁବର୍ ମତ ଦେଇଥିଲେ ଯେ ସେଠି ବାସି ଖାଦ୍ୟ ପରଷାଯାଉଛି। ଏହା ପରଠାରୁ ଗ୍ରାହକମହଲରେ ବିବାଦ ତେଜିଲା। କିଛି ମାସ ରେସ୍ତୋରାଁରେ ଭିଡ଼ ବି ଜମିଲାନି।
୬ ମାସ ପୂର୍ବେ ସେହି ରେସ୍ତୋରାଁ ମାଲିକ ପୁଣି ଥରେ ବ୍ୟବସାୟ ବଢ଼ାଇବାକୁ ଉଦ୍ୟମ କରି ବିଫଳ ହୋଇଛନ୍ତି। ଗ୍ରାହକଙ୍କୁ ଆକୃଷ୍ଟ କରିବା ପାଇଁ ସେ ସହରର ଅନ୍ୟ ନାମୀ ୟୁ-ଟ୍ୟୁବର୍ମାନଙ୍କୁ ଡକାଇ ଏକ ବିଶେଷ ଆୟୋଜନ କଲେ କିନ୍ତୁ ସେଭଳି ଆଖିଦୃଶିଆ ସଫଳତା ମିଳିଲାନି। ତିନି ବର୍ଷ କ୍ଷତିରେ ଚାଲିବା ପରେ ଶେଷରେ ମାଲିକ ରେସ୍ତୋରାଁକୁ ବନ୍ଦ କରିଛନ୍ତି। ଜଣେ ୟୁ-ଟ୍ୟୁବରଙ୍କ ଭୁଲ ମତାମତ ଯୋଗୁଁ ତାଙ୍କ ରେସ୍ତୋରାଁ ବନ୍ଦ ହେବା ସହିତ ଅନେକ କର୍ମଚାରୀ ଚାକିରି ହରାଇବା କହିଛନ୍ତି ରେସ୍ତୋରାଁ ମାଲିକ। ଏହି ଘଟଣା ପରଠାରୁ ଦକ୍ଷିଣ କୋରିଆରେ ୟୁ-ଟ୍ୟୁବର୍ମାନେ ମଧ୍ୟ ବିବାଦ ଘେରକୁ ଆସିଛନ୍ତି।
