ନୂଆଦିଲ୍ଲୀ, ୨୭ା୧୧: ମହିଳା ପ୍ରିମିୟର ଲିଗ୍ (ଡବ୍ଲ୍ୟୁପିଏଲ୍)ର ୪ର୍ଥ ସଂସ୍କରଣ ୨୦୨୬ ଜାନୁଆରୀ ୯ରୁ ଖେଳାଯିବ। ଏଥିପାଇଁ ଦିଲ୍ଲୀରେ ମେଗା ଖେଳାଳି ନିଲାମ ଗୁରୁବାର ଅନୁଷ୍ଠିତ ହୋଇଛି। ଏହି ନିଲାମରେ ଅଲ୍ରାଉଣ୍ଡର ଦୀପ୍ତି ଶର୍ମା ସବୁଠାରୁ ମହଙ୍ଗା ଖେଳାଳି ଭାବେ ବିକ୍ରି ହୋଇଛନ୍ତି। ୟୁପି ୱାରିଅର୍ଜ ଦୀପ୍ତିଙ୍କୁ ୩ କୋଟି ୨୦ ଲକ୍ଷ ଟଙ୍କାରେ ପୁନର୍ବାର ଦଳରେ ସାମିଲ କରିଛି। ନିଲାମ ସମୟରେ ଏକ ବଡ଼ ଡ୍ରାମା ଦେଖିବାକୁ ମିଳିଥିଲା। ପ୍ରାରମ୍ଭରେ ଦିଲ୍ଲୀ କ୍ୟାପିଟାଲ୍ସ ଦୀପ୍ତିଙ୍କୁ ୫୦ ଲକ୍ଷ ଟଙ୍କାରେ କିଣିଥିଲା। କିନ୍ତୁ ୟୁପି ୱାରିଅର୍ଜ ତୁରନ୍ତ ନିଜର ରାଇଟ୍ ଟୁ ମ୍ୟାଚ୍ କାର୍ଡ ବିକଳ୍ପ ବ୍ୟବହାର କରିଥିଲା। ଦିଲ୍ଲୀ ପୁଣି ଥରେ ନିଜର ଦାବି ଅର୍ଥ ବଢ଼ାଇଥିଲା। କିନ୍ତୁ ୟୁପି ଆଗକୁ ଯାଇ ୩ କୋଟି ୨୦ ଲକ୍ଷ ଟଙ୍କାରେ ଦୀପ୍ତିଙ୍କୁ କିଣି ପାରିଥିଲା।
ଏଥିସହିତ ଦୀପ୍ତି ଡବ୍ଲ୍ୟୁପିଏଲ୍ ଇତିହାସରେ ଦ୍ବିତୀୟ ସର୍ବାଧିକ ଦାମୀ ଖେଳାଳି ବିବେଚିତ ହୋଇଛନ୍ତି। ୨୦୨୩ରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ସ୍ମୃତି ମାନ୍ଧାନାଙ୍କୁ ୩ କୋଟି ୪୦ ଲକ୍ଷ ଟଙ୍କାରେ କ୍ରୟ କରିଥିଲା। ଯାହା ଡବ୍ଳ୍ୟୁପିଏଲର ସବୁଠାରୁ ଦାମୀ ଖେଳାଳି ରହିଛନ୍ତି। ନିଲାମ ହୋଇଥିବା ଅନ୍ୟ ପ୍ରମୁଖ ଖେଳାଳିଙ୍କ ମଧ୍ୟରେ ନ୍ୟୁଜିଲାଣ୍ଡର ଆମେଲିଆ କେର୍ଙ୍କୁ ମୁମ୍ବଇ ଇଣ୍ଡିଆନ୍ସ ୩ କୋଟି ଟଙ୍କାରେ, ଶିଖା ପାଣ୍ଡେଙ୍କୁ ୟୁପି ୱାରିଅର୍ଜ ୨ କୋଟି ୪୦ ଲକ୍ଷ ଟଙ୍କାରେ, ନ୍ୟୁଜିଲାଣ୍ଡର ସୋଫି ଡିଭାଇନଙ୍କୁ ଗୁଜରାଟ ଜ୍ୟାଣ୍ଟ୍ସ ୨ କୋଟିରେ, ଅଷ୍ଟ୍ରେଲିଆର ମେଗ୍ ଲାନିଙ୍ଗଙ୍କୁ ୟୁପି ୱାରିଅର୍ଜ ୧ କୋଟି ୯୦ ଲକ୍ଷ ଟଙ୍କାରେ, ଫିବି ଲିଚ୍ଫିଲ୍ଡଙ୍କୁ ୟୁପି ୱାରିଅର୍ଜ ୧ କୋଟି ୨୦ ଲକ୍ଷ ଟଙ୍କାରେ, ଦକ୍ଷିଣ ଆଫ୍ରିକା ଅଧିନାୟିକା ଲୌରା ଓଲଭାର୍ଟଙ୍କୁ ଦିଲ୍ଲୀ କ୍ୟାପିଟାଲ୍ସ ୧ କୋଟି ୧୦ ଲକ୍ଷ ଟଙ୍କାରେ, ଦିଲ୍ଲୀ କ୍ୟାପିଟାଲ୍ସ ୱେଷ୍ଟଇଣ୍ଡିଜ୍ର ଚିନେଲ ହେନରୀଙ୍କୁ ୧ କୋଟି ୩୦ ଲକ୍ଷରେ, ଶ୍ରୀ ଚରଣୀଙ୍କୁ ୧ କୋଟି ୩୦ ଲକ୍ଷ ଓ ଆଶା ଶୋଭନାଙ୍କୁ ୟୁପି ୱାରିଅର୍ଜ ୧ କୋଟି ୧୦ ଲକ୍ଷ ଟଙ୍କାରେ କିଣିଛି। ଅଷ୍ଟ୍ରେଲିଆର ତାରକା ଖେଳାଳି ଆଲିସା ହିଲି, ଆଲାନା କିଙ୍ଗ୍, ଇଂଲଣ୍ଡର ଏମି ଜୋନ୍ସ, ଭାରତର ଏସ୍. ମେଘନା, ପ୍ରତୀକା ରାୱଲ, ଇଂଲଣ୍ଡର ହିଦର ନାଇଟ୍ଙ୍କୁ କୌଣସି ଦଳ କିଣିନାହାନ୍ତି। ସମସ୍ତ ୫ଟି ଫ୍ରାଞ୍ଚାଇଜି ନିଲାମରେ ସାମିଲ ହୋଇଥିଲେ। ମୋଟ୍ ୨୭୦ ଜଣ ଖେଳାଳି ନାମ ପଞ୍ଜୀକରଣ ହୋଇଥିଲା; ଯେଉଁଥିରେ ୮୩ ଜଣ ଅନ୍ତର୍ଜାତୀୟ ଖେଳାଳି ଥିଲେ। ଏହି ନିଲାମରେ ୬୭ ଖେଳାଳି ବିକ୍ରି ହୋଇଥିବା ବେଳେ ସେମାନଙ୍କ ମଧ୍ୟରେ ୨୩ ଜଣ ବିଦେଶୀ ଖେଳାଳି ରହିଛନ୍ତି। ଏଥିପାଇଁ ମୋଟ୍ ୪୦ କୋଟି ୮୦ ଲକ୍ଷ ଟଙ୍କା ବ୍ୟୟ କରା ଯାଇଥିଲା।
