ଜୋହାନ୍ସବର୍ଗ : ଦକ୍ଷିଣ ଆଫ୍ରିକା ମହିଳା କ୍ରିକେଟ ଦଳର ଦୁଇଜଣ ସଦସ୍ୟା ସମଲିଙ୍ଗୀ ବିବାହ ବନ୍ଧନରେ ଆବଦ୍ଧ ହୋଇଛନ୍ତି। ଶନିବାର ଏଠାରେ ଅନୁଷ୍ଠିତ ଏକ ଉତ୍ସବରେ ଅଧିନାୟିକା ଡେନ୍ ଭାନ୍ ନିକର୍କ ଦଳୀୟ ଅଲରାଉଣ୍ଡର ମାରିଜାନ୍ କ୍ୟାପ୍ଙ୍କୁ ବିବାହ କରିଛନ୍ତି। ୨୦୦୯ ମହିଳା ବିଶ୍ୱକପ ଅବସରରେ ଏ ଦୁଇ ଖେଳାଳି ଆନ୍ତର୍ଜାତିକ କ୍ରିକେଟରେ ପଦାର୍ପଣ କରିଥିଲେ। ଦିନିକିଆ ଫର୍ମାଟରେ ନିକର୍କ ଏପର୍ଯ୍ୟନ୍ତ ୧୨୫ଟି ୱିକେଟ ଅକ୍ତିଆର କରିଥିବାବେଳେ କ୍ୟାପ୍ ୯୯ଟି ୱିକେଟ ନେଇସାରିଛନ୍ତି। ବ୍ୟାଟିଂରେ ମଧ୍ୟ ଦୁଇ କ୍ରିକେଟର ସମାନ୍ତରାଳ ଭାବେ ଆଗେଇ ଚାଲିଛନ୍ତି। ନିକର୍କ ୧୭୭୦ ରନ ସ୍କୋର କରିଥିବାବେଳେ କ୍ୟାପ୍ ୧୬୧୮ ରନ ସ୍କୋର କରିଛନ୍ତି। କ୍ରିକେଟ ଇତିହାସରେ ସମଲିଙ୍ଗୀ ବିବାହର ଏକାଧିକ ଦୃଷ୍ଟାନ୍ତ ରହିଛି। ୨୦୧୫ରେ ଅଷ୍ଟ୍ରେଲିଆର ପୂର୍ବତନ ମହିଳା କ୍ରିକେଟର ଆଲେକ୍ସ ବ୍ଲାକ୍ୱେଲ ଇଂଲଣ୍ଡର ପୂର୍ବତନ ମହିଳା କ୍ରିକେଟର ଲିନ୍ସି ଆସ୍କିଉଙ୍କୁ ବିବାହ କରିଥିବାବେଳେ ୨୦୧୭ରେ ଅଷ୍ଟ୍ରେଲିଆର ଏଲିସ ଭିଲାନି ସାଥୀ କ୍ରିକେଟର ନିକୋଲ ବୋଲଟନ୍ଙ୍କୁ ସମଲିଙ୍ଗୀ ବିବାହ କରି ଚର୍ଚ୍ଚାକୁ ଆସିଥିଲେ।
