ବିଦ୍ୟାଳୟ ରୂପାନ୍ତର କାର୍ଯ୍ୟ ତଦାରଖ କଲେ ବିଡିଓ

ଆଠଗଡ : ଆଠଗଡ ମଣ୍ଡଳ ଉନ୍ନୟନ ଅଧିକାରୀ ପ୍ରଦୀପ କୁମାର ସାହୁ ୫-ଟି ବିଭାଗ ଦ୍ୱାରା ରୂପାନ୍ତର କାର୍ଯ୍ୟ ଚାଲିଥିବା କେତେକ ବିଦ୍ୟାଳୟ ସୋମବାର ପରିଦର୍ଶନ କରି ଉନ୍ନୟନ କାର୍ଯ୍ୟ ତଦାରଖ କରିଥିଲେ। କୁଲାଇଲୋସ୍ଥିତ ଅନନ୍ତ ଦଳାଇ ସ୍ମୃତି ବିଦ୍ୟାପୀଠ, କଣ୍ଡରେଇସ୍ଥିତ ଶ୍ୟାମସୁନ୍ଦର ବିଦ୍ୟାପୀଠ ଏବଂ ସଠିଲୋ-ବାସୁଦେବପୁର ହାଇସ୍କୁଲ ପରିଦର୍ଶନ କରି ଉନ୍ନୟନ କାର୍ଯ୍ୟ ଉନ୍ନତ ମାନର କରିବା ଉପରେ ଗୁରୁତ୍ୱାରୋପ କରିବା ସହ ସମସ୍ତ ନିର୍ମାଣ କାର୍ଯ୍ୟ ଯଥାଶୀଘ୍ର ସଂପୂର୍ଣ୍ଣ କରିବା ପାଇଁ ନିର୍ଦ୍ଦେଶ ଦେଇଥିଲେ। ବ୍ଲକ ସହକାରୀ ନିର୍ବାହୀ ଯନ୍ତ୍ରୀ ବିଷ୍ଣୁ ପ୍ରସାଦ ଖାଡେଙ୍ଗା ବିଡିଓଙ୍କ ସହ ପରିଦର୍ଶନରେ ଯାଇ ଚାଲିଥିବା ନିର୍ମାଣ କାର୍ଯ୍ୟର ମାନ ଯାଞ୍ଚ କରିଥିଲେ । ସେହିପରି ବିଡିଓ ଶ୍ରୀ ସାହୁ ଉକ୍ତ ବିଦ୍ୟାଳୟ ଗୁଡିକରେ ଚାଲିଥିବା ମଧ୍ୟାନ୍ନ ଭୋଜନର ମାନ ମଧ୍ୟ ଯାଞ୍ଚ କରିଥିଲେ। ସେଠାରୁ ଫେରିବା ପରେ ବ୍ଲକ କାର୍ଯ୍ୟାଳୟରେ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁଙ୍କ ନିର୍ଦ୍ଦେଶକ୍ରମେ ବେଣ୍ଟପଦା ଗ୍ରାମର ଜଣେ ଭିନ୍ନକ୍ଷମ ରାକେଶ ପଣ୍ଡାଙ୍କୁ ପୂର୍ବତନ ବ୍ଲକ ଅଧ୍ୟକ୍ଷ ରଞ୍ଜନ କୁମାର ଆଚାର୍ଯ୍ୟଙ୍କ ମାଧ୍ୟମରେ ଏକ ହ୍ୱିଲ ଚେୟାର ପ୍ରଦାନ କରିଥିଲେ । ମଣ୍ଡଳ ସାମାଜିକ ସୁରକ୍ଷା ଅଧିକାରିଣୀ ପ୍ରାଚୀ ସାହୁଙ୍କ ସଂଯୋଜନାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ବେଣ୍ଟପଦା ସରପଞ୍ଚ ଶ୍ରୀକାନ୍ତ ପଣ୍ଡା ଉପସ୍ଥିତ ଥିଲେ।

Comments are closed.