ଭୁବନେଶ୍ଵର: ଖରାରୁ ଏବେ ନିସ୍ତାର ନାହିଁ। ଆସନ୍ତା ୫ଦିନ ପର୍ଯ୍ୟନ୍ତ ରାଜ୍ୟରେ ପ୍ରଚଣ୍ଡ ଖରା ଜାରି ରହିବ। ଆଜି ସକାଳ ୮ଟା ୩୦ ସୁଦ୍ଧା ୩୨ ଡିଗ୍ରୀ ଛୁଇଁଛି ୪ ସହର। ୩୨.୬ ଡିଗ୍ରୀ ସହ ଭୁବନେଶ୍ଵର ସବୁଠୁ ଉତ୍ତପ୍ତ ସହର ପାଲଟିଛି। ପାରାଦୀପ , ପୁରୀ ଓ କେନ୍ଦୁଝରରେ ତାପମାତ୍ରା ୩୨ ଡିଗ୍ରୀ ରହିଛି। ସେହିପରି ବାଲେଶ୍ଵର ୩୧.୮, ଚାନ୍ଦବାଲି ୩୧.୬, ଝାରସୁଗୁଡା ୩୦.୮ ଡିଗ୍ରୀ ରେକର୍ଡ ହୋଇଛି। ସେପଟେ ରବିବାର ସକାଳୁ ଦିନ ତାପମାତ୍ରା ବୃଦ୍ଧି ପାଇଥିଲା। କେତେକ ଅଞ୍ଚଳରେ ସକାଳ ସାଢେ ୮ଟା ବେଳକୁ ପାରଦ ୩୦ଡିଗ୍ରୀ ଟପିଥିଲା। ବାୟୁମଣ୍ଡଳରେ ଉଷ୍ଣ ଆର୍ଦ୍ରତା ଯୋଗୁଁ ଦିନ ତମାମ ଗରମ ଅନୁଭୂତ ହୋଇଥିଲା। ପାଣିପାଗ କେନ୍ଦ୍ରର ପୂର୍ବାନୁମାନ, ରାଜ୍ୟ ମଧ୍ୟକୁ ଉତ୍ତର ତଥା ଉତ୍ତର-ପଶ୍ଚିମ ଏବଂ ପଶ୍ଚିମ ଦିଗରୁ ଶୁଷ୍କ ପବନର ପ୍ରବାହ ଧୀରେ ଧୀରେ ବୃଦ୍ଧି ପାଉଥିବାରୁ ଦିନ ତାପମାତ୍ରାରେ ବୃଦ୍ଧି ଘଟୁଛି। ଏହି ପବନର ପ୍ରବାହ ଆଗାମୀ ଦିନରେ ଆହୁରି ବୃଦ୍ଧି ପାଇବା ସମ୍ଭାବନା ରହିଛି। ଫଳରେ ଆଗାମୀ ୪ରୁ୫ ଦିନ ମଧ୍ୟରେ ରାଜ୍ୟରେ ଦିନ ତାପମାତ୍ରା ୪ରୁ ୬ ଡିଗ୍ରୀ ପର୍ଯ୍ୟନ୍ତ ବୃଦ୍ଧି ପାଇବ । ପୂର୍ବାହ୍ଣ ୧୧ଟାରୁ ଅପରାହ୍ଣ ସାଢେ ୩ଟା ମଧ୍ୟରେ ଜରୁରୀ କାର୍ଯ୍ୟ ନଥିଲେ ପଦାକୁ ବାହାରିବାକୁ ବାରଣ କରାଯାଇଛି। ଏହି ସମୟରେ ଶ୍ରମିକମାନେ କାମ ନ କରିବାକୁ କୁହାଯାଇଛି। ଏସଆରସି ସତ୍ୟବ୍ରତ ସାହୁ ସମ୍ପୃକ୍ତ ଜିଲାର ଜିଲାପାଳଙ୍କୁ ସତର୍କ ରହିବାକୁ ନିର୍ଦେଶ ଦେଇଛନ୍ତି।
Comments are closed.