ଭୁବନେଶ୍ୱର : ମୌସୁମୀ ନିମ୍ନ ଚାପରେଖା ପ୍ରଭାବରେ ସୋମବାର ଭୁବନେଶ୍ବର, କଟକ ସମେତ ପୁରୀ, ଜଗତସିଂହପୁର, ଗଞ୍ଜାମ, ଅନୁଗୋଳ, ଢେଙ୍କାନାଳ, ନୟାଗଡ଼ ଜିଲାରେ ସ୍ବଳ୍ପରୁ ମଧ୍ୟମଧରଣ ବର୍ଷା ହୋଇଛି। ଆଜିଠାରୁ ରାଜ୍ୟରେ ପ୍ରବଳ ବର୍ଷା ସମ୍ଭାବନା ରହିଛି। ଆସନ୍ତା ୯ ତାରିଖ ଯାଏଁ ରାଜ୍ୟରେ ବିଜୁଳି ଘଡ଼ଘଡ଼ି ସହ ପ୍ରବଳ ବର୍ଷା ନେଇ ଭୁବନେଶ୍ବର ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ହଳଦିଆ ସତର୍କତା ଜାରି କରାଯାଇଛି। ଆଜି ମୟୂରଭଞ୍ଜ, କେନ୍ଦୁଝର, ସୁନ୍ଦରଗଡ଼, ଝାରସୁଗୁଡ଼ା, ବରଗଡ଼, ସମ୍ବଲପୁର, ଦେବଗଡ଼, ବାଲେଶ୍ବର, ଭଦ୍ରକ, କେନ୍ଦ୍ରାପଡ଼ା, ଜଗତସିଂହପୁର, କଟକ, ଖୋର୍ଦ୍ଧା, ନବରଙ୍ଗପୁର, କାଳହାଣ୍ଡି, ରାୟଗଡ଼ା, କୋରାପୁଟ ପ୍ରମୁଖ ୧୭ ଜିଲାରେ ବିଜୁଳି ଘଡ଼ଘଡ଼ି ସହ ପ୍ରବଳ ବର୍ଷା (୭ରୁ ୧୧ ସେମି) ହୋଇପାରେ। ଏହାର ପରିଦିନ ଅର୍ଥାତ୍ ୭ରୁ ୮ ତାରିଖ ମଧ୍ୟରେ ବର୍ଷା ପରିମାଣ ବୃଦ୍ଧି ପାଇବ। ସୁନ୍ଦରଗଡ଼, ଝାରସୁଗୁଡ଼ା, ବରଗଡ଼ ଏବଂ ସମ୍ବଲପୁର ଜିଲାକୁ ଅତିପ୍ରବଳ ବର୍ଷା ନେଇ ୟେଲୋ ୱାର୍ଣ୍ଣିଂ ଜାରି ହୋଇଛି। ଆଉ କେତେକ ସ୍ଥାନରେ ପ୍ରବଳ ବର୍ଷା ସମ୍ଭାବନା ରହିଛି। ସୋମବାର ଅପରାହ୍ଣରେ ଭୁବନେଶ୍ବର ଓ କଟକରେ ବିଜୁଳି ଘଡ଼ଘଡ଼ି ସହ ବର୍ଷା ଯୋଗୁଁ ସହରର ବିଭିନ୍ନ ସ୍ଥାନ ଜଳାର୍ଣ୍ଣବ ହୋଇପଡ଼ିଥିଲା। ମାତ୍ର ଘଣ୍ଟାଏ ଭିତରେ ରାଜଧାନୀରେ ୪୩.୯ ମି.ମି. ବର୍ଷା ହୋଇଥିଲା। ଫଳରେ ଖାଲୁଆ ସ୍ଥାନରେ ଜଳବନ୍ଦୀ ସମସ୍ୟା ଦେଖା ଦେଇଥିଲା ଓ ଗମନାଗମନରେ ଲୋକମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଥିଲେ। ଅନ୍ୟପକ୍ଷରେ କଟକରେ ଅପରାହ୍ଣ ୫.୩୦ ସୁଦ୍ଧା ୨୯.୪ ମି.ମି, ତାଳଚେରରେ ୨୧ ମି.ମି, ନୟାଗଡ଼ରେ ୧୯ ମି.ମି. ବର୍ଷା ହୋଇଥିଲା। ସେହିପରି ଗତ ୨୪ ଘଣ୍ଟା ମଧ୍ୟରେ ତାଳଚେରରେ ୪୫ ମି.ମି., ସମ୍ବଲପୁର ୪୨.୨ ମି.ମି., ହୀରାକୁଦରେ ୪୦.୮ମି.ମି, ନୂଆପଡ଼ାରେ ୨୮.୮ ମି.ମି., ଢେଙ୍କାନାଳରେ ୨୮ ମି.ମି. ବର୍ଷା ହୋଇଛି।
Popular Categories
Previous article
Next article