ଚମ୍ପିଆନ୍ସ ଟ୍ରଫି ବିଜୟ ଉତ୍ସବ ବେଳେ ହିଂସା; ପୋଡ଼ିଦେଲେ କାର, ଦୋକାନ

ସମାଜ ଡିଜିଟାଲ​‌ ଡେସ୍କ: ଭାରତ ଚମ୍ପିଆନ୍ସ ଟ୍ରଫି ଜିତିବା ପରେ ସାରା ଦେଶରେ ଉତ୍ସବର ମାହୋଲ ଦେଖିବାକୁ ମିଳିଥିଲା। ଅନେକ ସ୍ଥାନରେ କ୍ରିକେଟପ୍ରେମୀମାନେ ବିଳମ୍ବିତ ରାତି ପର୍ଯ୍ୟନ୍ତ ଉତ୍ସବ ମନାଇଥିଲେ। କିନ୍ତୁ ଏହି ଉତ୍ସବବେଳେ ମଧ୍ୟପ୍ରଦେଶର ମୋହ ଅଞ୍ଚଳର ୫ଟି ସ୍ଥାନରେ ହିଂସାକାଣ୍ଡ ଘଟିଛି। ଦୁଇ ସମ୍ପ୍ରଦାୟ ମଧ୍ୟରେ ଗଣ୍ଡଗୋଳ ଘଟିଛି। ଉତ୍ତ୍ୟକ୍ତ ଲୋକମାନେ ଅନେକ ଦୋକାନ ସମେତ କାର, ବାଇକ ପୋଡ଼ି ଦେଇଛନ୍ତି। ୪ ଜଣ ଗୁରୁତର ଆହତ ହୋଇଛନ୍ତି। ଏହି ଘଟଣାକୁ ନେଇ ମୋହ ଅଞ୍ଚଳରେ ଉତ୍ତେଜନାପୂର୍ଣ୍ଣ ବାତାବରଣ ଲାଗିରହିଛି।

ଶହର କାଜି ମହମ୍ମଦ ଜାବିର କହିଛନ୍ତି, ମସଜିଦ ସାମ୍ନାରେ ଉତ୍ସବ ମନାଇବା ଉପରେ ପ୍ରତିବନ୍ଧକ ଲାଗିଥିଲା। ତଥାପି ଏପରି କରାଗଲା। ମସଜିଦ ନିକଟରେ ପ୍ରତିପକ୍ଷ ଲୋକମାନେ ହିଂସାର ସୂତ୍ରପାତ କରାଇଥିଲେ। ଉଭୟ ପକ୍ଷରୁ ପଥରମାଡ଼ ହୋଇଛି। କୌଣସି ପକ୍ଷ ନିର୍ଦୋଷ ନୁହନ୍ତି। ମୁସଲମାନଙ୍କ ଦୋକାନ, ଗାଡ଼ି ପୋଡ଼ିଦେଲେ। ପ୍ରଶାସନ ବି ବିଫଳ ହେଲା। ବୋଧହୁଏ ଭାରତ-ନ୍ୟୁଜିଲାଣ୍ଡ ମ୍ୟାଚରେ ଏପରି ପରିସ୍ଥିତି ସୃଷ୍ଟି ହେବ ବୋଲି ସେମାନେ ଜାଣି ନ ଥିଲେ। ଭାରତ-ପାକିସ୍ତାନ ମ୍ୟାଚ ଥିଲେ ଏଭଳି ହେବା ଆଶଙ୍କା କରାଯାଇପାରେ। ସେଥିପାଇଁ ପୁଲିସ ଆଗୁଆ ସତର୍କ ହୋଇ ନ ଥିଲା। ସମସ୍ତେ ଶାନ୍ତି ବଜାୟ ରଖନ୍ତୁ ଏବଂ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଉ ବୋଲି ସେ କହିଛନ୍ତି।

ଏହି ହିଂସା ମାମଲାରେ ପୁଲିସ ସୋମବାର ସୁଦ୍ଧା ୧୩ ଜଣଙ୍କୁ ଗିରଫ କରିଛି। ଇନ୍ଦୋର ଜିଲାପାଳ ଆଶିଷ  ସିଂହ କହିଛନ୍ତି ଯେ, ସ୍ଥିତି ନିୟନ୍ତ୍ରଣାଧୀନ ରହିଛି। ପୁଲିସ ତାଲ ମୋହଲ୍ଲା, ସେବା ମାର୍ଗ, ପତ୍ନୀ ବଜାର, ମାନେକ ଛକ ଏବଂ ଜାମା ମସଜିଦ ଅଞ୍ଚଳରେ ହୋଇଥିବା ହିଂସାକାଣ୍ଡର ତଦନ୍ତ ଚଳାଇଛି।