ଲଣ୍ଡନ: ଭାରତୀୟ ମଦ ବ୍ୟବସାୟୀ ବିଜୟ ମାଲ୍ୟାଙ୍କୁ ବ୍ରିଟେନ ଉଚ୍ଚ ନ୍ୟାୟାଳୟରୁ ଅଶ୍ବସ୍ତି ମିଳିଛି। ଭାରତୀୟ ବ୍ୟାଙ୍କ ସମୂହଙ୍କ ଏକ ପିଟିଶନର ଶୁଣାଣିକୁ ବ୍ରିଟେନର ଲଣ୍ଡନସ୍ଥିତ ଉଚ୍ଚ ନ୍ୟାୟାଳୟ ସ୍ଥଗିତ କରିଦେଇଛନ୍ତି। ମାଲ୍ୟାଙ୍କଠାରୁ ୧୦ ହଜାର ୮୩୯ କୋଟି ୩ ହଜାର ୫୩୮ ଟଙ୍କା ଋଣ ଟଙ୍କା ଅସୁଲ କରିବା ପାଇଁ ତାଙ୍କୁ ଦେବାଳିଆ ଘୋଷଣା କରିବା ଲାଗି ବ୍ୟାଙ୍କଗୁଡ଼ିକ ପକ୍ଷରୁ କୋର୍ଟରେ ଆବେଦନ କରାଯାଇଥିଲା।
ଉଚ୍ଚ ନ୍ୟାୟାଳୟଙ୍କ ଦେବାଳିଆ ଶାଖାର ବିଚାରପତି ମାଇକ ବ୍ରିଗ୍ସ ଏହି ପିଟିଶନର ଶୁଣାଣିକୁ ସ୍ଥଗିତ କରିବା ସହିତ ମାଲ୍ୟାଙ୍କୁ ଅଶ୍ବସ୍ତି ଦେଇ କହିଥିଲେ, ଯେପର୍ଯ୍ୟନ୍ତ ଭାରତୀୟ ଉଚ୍ଚତମ ନ୍ୟାୟାଳୟ ଏବଂ କର୍ଣ୍ଣାଟକ ଉଚ୍ଚ ନ୍ୟାୟାଳୟ ମାଲ୍ୟାଙ୍କ ଆପୋସ ବୁଝାମଣା ପ୍ରସ୍ତାବର ଶୁଣାଣିକୁ ଶେଷ କରିନାହାନ୍ତି ସେପର୍ଯ୍ୟନ୍ତ ମାଲ୍ୟାଙ୍କୁ ସମୟ ଦେବା ଉଚିତ। ତେଣୁ ବ୍ୟାଙ୍କଗୁଡ଼ିକର ଏପରି କାର୍ଯ୍ୟାନୁଷ୍ଠାନକୁ ଆଗକୁ ବଢ଼ାଇବା ଲାଗି ସୁଯୋଗ ଦେବାର କୌଣସି କାରଣ ନାହିଁ ବୋଲି ବ୍ରିଗ୍ସ କହିଥିଲେ।
ସୂଚନାଯୋଗ୍ୟ, ମାଲ୍ୟାଙ୍କ ବିରୋଧରେ ୯ ହଜାର କୋଟି ଟଙ୍କାର ଋଣ ଟଙ୍କା ଫାଙ୍କିବା ଅଭିଯୋଗରେ ମାମଲା ରୁଜୁ ହୋଇଛି। ତେବେ ମାଲ୍ୟା ଋଣ ଟଙ୍କା ଫେରାଇବାକୁ ପ୍ରସ୍ତୁତ ଥିବା କହୁଥିବାବେଳେ ମାମାର ତଦନ୍ତ କରୁଥିବା ପ୍ରବର୍ତ୍ତନ ନିର୍ଦେଶାଳୟ ଏବଂ ଭାରତୀୟ ବ୍ୟାଙ୍କଗୁଡ଼ିକ ସହଯୋଗ କରୁ ନ ଥିବା ଦର୍ଶାଇ ମାଲ୍ୟା ସୁପ୍ରିମକୋର୍ଟଙ୍କ ଦ୍ବାରସ୍ଥ ହୋଇଛନ୍ତି।
Comments are closed.