ସୁନ୍ଦରଗଡ଼ : ଲାଞ୍ଚ ତ ଲାଞ୍ଚ, ତା ପୁଣି ନିଜ ଅଧିନସ୍ଥ ଅଧିକାରୀଙ୍କ ଠାରୁ ନେଇ ଜୈନିକ ଅବସରପ୍ରାପ୍ତ ଜିଲା କୃଷି ଅଧିକାରୀଙ୍କୁ ଭିଜିଲାନ୍ସ ଅଦାଲତ ସଶ୍ରମ କାରାଦଣ୍ଡାଦେଶ ଦେବା ଓ ତଣ୍ଡ ଗଣିବା ପାଇଁ ନିର୍ଦେଶ ଦେବା ଘଟଣା ଚର୍ଚ୍ଚାର ବିଷୟ ହୋଇଛି । ବିଭାଗୀୟ ସୂତ୍ରରୁ ପ୍ରକାଶ, ସୁନ୍ଦରଗଡ଼ ଭିଜିଲାନ୍ସ ଅଦାଲତର ସ୍ବତନ୍ତ୍ର ଜଜ୍ ସୁଶ୍ରୀ ରାଜଲକ୍ଷ୍ମୀ ପଟ୍ଟନାୟକ ୨୦୦୯ ମସିହାର ଏକ ଲାଞ୍ଚ ନେବା ଘଟଣାର ପୂର୍ଣ୍ଣାଙ୍ଗ ଶୁଣାଣି କରି ଅଭିଯୁକ୍ତ ଅବସରପ୍ରାପ୍ତ ଜିଲା କୃଷି ଅଧିକାରୀ ଦୈତାରି ଶତପଥିଙ୍କୁ ଦୁଇ ବର୍ଷ ସଶ୍ରମ କାରାଦଣ୍ଡାଦେଶ ଶୁଣାଇବା ସହ ୫ହଜାର ଟଙ୍କା ତଣ୍ଡ ଗଣିବା ପାଇଁ ଆଦେଶ ଦେଇଛନ୍ତି । ତଣ୍ଡ ଅନାଦେୟ ଅଧିକ ୩ମାସ ସଶ୍ରମ କାରାଦଣ୍ଡ ଭୋଗିବା ପାଇଁ ନିଜ ରାୟରେ ସ୍ପଷ୍ଟ କରିଛନ୍ତି । ଅଭିଯୁକ୍ତ ଜିଲା କୃଷି ଅଧିକାରୀ ଶ୍ରୀ ଶତପଥି ନିଜ ଅଧିନସ୍ଥ ଅଧିକାରୀ ଗୟାଧର ସାହୁଙ୍କଠାରୁ ତାଙ୍କ ୨୦ମାସର ଘର ଭଡ଼ା ବାବଦ ଦେୟ ୫୨ହଜାର ୯ଶହ ଟଙ୍କାର ବିଲ ପାଶ କରାଇବା ପାଇଁ ୫ହଜାର ଟଙ୍କା ଲାଞ୍ଚ ମାଗିଥିଲେ ହେଲେ ଏତେ ଟଙ୍କା ଗୟାଧର ଦେବା ପାଇଁ ଅସହମତି ପ୍ରକାଶ କରିବା ସହ ୩ହଜାର ଟଙ୍କା ଦେଇ ପାରିବି ବୋଲି କହିବାରୁ ଅଭିଯୁକ୍ତ ଅଧିକାରୀ ୩ହଜାର ଟଙ୍କାରେ ସହମତି ପ୍ରକାଶ କରି ଉତ୍କୋଚ ଗ୍ରହଣ କରୁଥିବା ବେଳେ ଭିଜିଲାନ୍ସ ଟିମ ହାତରେ ଧରାପଡ଼ିଥିଲେ। ପରେ ଭିଜିଲାନ୍ସ ବିଭାଗ ତାଙ୍କ ବିରୋଧରେ ଅଦାଲତରେ ଅଭିଯୋଗ ପତ୍ର ଦାଖଲ କରିଥିଲେ। ଅନ୍ୟ କେତେକ ଯୋଜନାରେ ମଧ୍ୟ ଅଭିଯୁକ୍ତ ଅଧିକାରୀ ଜଣଙ୍କ ଅଧିନସ୍ଥ ଅଧିକାରୀ ଶ୍ରୀ ସାହୁଙ୍କଠାରୁ ଲାଞ୍ଚ ନେଇଥିବା ତଦନ୍ତରୁ ଜଣାପଡ଼ିଛି। ତତ୍କାଳୀନ ଭିଜିଲାନ୍ସ ଡି.ଏସ.ପି ରାଧାକୃଷ୍ଣ କାନୁନଗୋ ଏହି ଲାଞ୍ଚ କାରବାରର ତଦନ୍ତ କରିଥିବା ବେଳେ ତତ୍କାଳୀନ ଇନ୍ସପେକ୍ଟର ପରମେଶ୍ବର କିଶାନ ତାଙ୍କୁ ସହାୟତା କରିଥିଲେ। ଭାରପ୍ରାପ୍ତ ସ୍ବତନ୍ତ୍ର ପିପି ଗୌରମୋହନ ଦାଶ ଅଦାଲତରେ ମାମଲା ପରିଚାଳନା କରିଥିଲେ।
Popular Categories
Previous article
Next article