ବସ୍ତିବାସିନ୍ଦାଙ୍କୁ ଜମି ପଟ୍ଟା ବଣ୍ଟନ

ଆଠଗଡ : ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗୁରୁବାର ଆଭାସୀ କାର୍ଯ୍ୟକ୍ରମ ମାଧ୍ୟମରେ ରାଜ୍ୟର ୫ଟି ସହରର ବସ୍ତିବାସିନ୍ଦାଙ୍କୁ ଜମିପଟ୍ଟା ବଣ୍ଟନ କରିଛନ୍ତି। ଏହି ଆଭାସୀ କାର୍ଯ୍ୟକ୍ରମରେ ଆଠଗଡ ଏନଏସି କର୍ତ୍ତୃପକ୍ଷ ସାମିଲ ହୋଇଥିଲେ । ପୂର୍ବରୁ ଆଠଗଡ ସହରାଞ୍ଚଳର ଅନେକ ଭୂମିହୀନ ବସ୍ତିବାସିନ୍ଦାଙ୍କୁ ଜମିପଟ୍ଟା ଆବଣ୍ଟନ କରାଯାଇଛି । ଆଜି ମୁଖ୍ୟମନ୍ତ୍ରୀଙ୍କ ଦ୍ୱାରା ରାଜ୍ୟର ୩୩ଟି ସହରରେ ୭୦୭ଟି ବିଜୁ ଆଦର୍ଶ କଲୋନୀ ଲୋକାର୍ପିତ ହୋଇଥିଲା । ଏହି ଆଭାସୀ କାର୍ଯ୍ୟକ୍ରମରେ ପୂର୍ବରୁ ସାମିଲ ହୋଇଥିବା ଆଠଗଡ ସହରାଞ୍ଚଳର ବସ୍ତିବାସିନ୍ଦା ଓ ଏନଏସିର ନିର୍ବାଚିତ ପରିଷଦ ଏହି କାର୍ଯ୍ୟକ୍ରମକୁ ବିଜୁ ପଟ୍ଟନାୟକ କଲ୍ୟାଣ ମଣ୍ଡପଠାରେ ଦେଖିବା ସହିତ ମୁଖ୍ୟମନ୍ତ୍ରୀ ଓ ସ୍ଥାନୀୟ ବିଧାୟକ ତଥା କୃଷିମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁଙ୍କୁ କୃତଜ୍ଞତା ଜଣାଇଥିଲେ। ଏହି କାର୍ଯ୍ୟକ୍ରମରେ ଏନଏସି ଅଧ୍ୟକ୍ଷା ସସ୍ମିତା ରାଉତ, ଉପାଧ୍ୟକ୍ଷ ବି. ଶୁଭ୍ରଶଙ୍କର ଜ୍ୟୋତି, ନିର୍ବାହୀ ଅଧିକାରୀ ଆକ୍ରିତି ଗୋଏଙ୍କା, ସମାଜସେବୀ ପ୍ରକାଶ ରାଉତ, ପ୍ରସନ୍ନ ଭକ୍ତାଙ୍କ ସମେତ ବହୁ କାଉନସିଲର ଯୋଗଦାନ କରିଥିଲେ । ଆଠଗଡ ସହରାଞ୍ଚଳରେ ବସବାସ କରୁଥିବା ଏବଂ ଜମିପଟ୍ଟା ପାଇନଥିବା ଭୂମିହୀନ ଲୋକଙ୍କୁ ପରବର୍ତ୍ତୀ ପର୍ଯ୍ୟାୟରେ ଜମିପଟ୍ଟା ବଣ୍ଟନ କରାଯିବ ବୋଲି ଅଧ୍ୟକ୍ଷା ଶ୍ରୀମତୀ ରାଉତ କହିଥିଲେ । ଏହି କାର୍ଯ୍ୟକ୍ରମ ପରିଚାଳନାରେ ଏନଏସିର ସମସ୍ତ ଅଧିକାରୀ ଓ କର୍ମଚାରୀ ସହଯୋଗ କରିଥିଲେ ।