ଖ୍ରୀଷ୍ଟଚର୍ଚ୍ଚ : ନ୍ୟୁଜଲାଣ୍ଡର ଖ୍ରୀଷ୍ଟଚର୍ଚ୍ଚସ୍ଥିତ ୨ ମସଜିଦରେ ବର୍ବରୋଚିତ ଆତଙ୍କବାଦୀ ଆକ୍ରମଣର ୧୦ ଦିନ ମଧ୍ୟରେ ଦେଶର ବନ୍ଧୁକ ଆଇନରେ ସଂଶୋଧନ କରାଯିବ ବୋଲି ପ୍ରଧାନମନ୍ତ୍ରୀ ଜାସିଣ୍ଡା ଆଡ୍ରେର୍ଣ୍ଣ ସୋମବାର ଗୁରୁତ୍ବପୂର୍ଣ୍ଣ ଘୋଷଣା କରିଛନ୍ତି। ସେ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି, ଏହାଦ୍ବାରା ଦେଶର ପ୍ରତ୍ୟେକ ନାଗରିକ ସୁରକ୍ଷିତ ହୋଇପାରିବେ। ଆଇନ କୋହଳ ଥିବାରୁ ଏଭଳି ଘଟଣା ଘଟିଛି। ସମୟର ଆବଶ୍ୟକତା ଅନୁସାରେ ଏହାକୁ କଡ଼ାକଡ଼ି କରିବାକୁ ହେବ ବୋଲି ସେ ଦର୍ଶାଇଛନ୍ତି। ଉଲ୍ଲେଖ ଯେ ମାର୍ଚ୍ଚ ୧୫ ତାରିଖରେ ଏଠାକାର ଅଲନୁର ମସଜିଦ ଏବଂ ଲିନବୁଡ ମସଜିଦରେ ଶୁକ୍ରବାର ପ୍ରାର୍ଥନା ଚାଲିଥିବା ବେଳେ ଆତଙ୍କବାଦୀ ବ୍ରେଣ୍ଟୋନ ହ୍ୟାରିସନ ଟାରାଣ୍ଟ ଅତର୍କିତ ଆଖିବୁଜା ଗୁଳିମାଡ଼ କରିଥିଲା। ଏହି ଗୁଳିକାଣ୍ଡ ଜନିତ ମୃତ୍ୟୁ ସଂଖ୍ୟା ଇତିମଧ୍ୟରେ ୫୦ରେ ପହଞ୍ଚିଛି। ବ୍ରେଣ୍ଟୋନକୁ କୋର୍ଟ ହାଜତକୁ ପଠାଇ ଦେଇଛନ୍ତି। ଏପ୍ରିଲ ୫ରେ ସାଉଥ ଆଇଲାଣ୍ଡ ସିଟି କୋର୍ଟରେ ବ୍ରେଣ୍ଟୋନ ବିରୋଧରେ ପରବର୍ତ୍ତୀ ଶୁଣାଣି ହେବ।
