ଭୁବନେଶ୍ଵର : ଏଚ୍.ଏଚ୍.ଆଇ ହୋଟେଲରେ ଶ୍ରୀ ଶକ୍ତି ଫାଉଣ୍ଡେସନ ଦ୍ବାରା ଆୟୋଜିତ ହୋଇଯାଇଛି ଟପ୍ ମଡେଲ୍ ଶୋ’ ଓ ବ୍ୟବସାୟ ପୁରସ୍କାର ସମ୍ମିଳନୀ । ଯେଉଁଠାରେ ମୁଖ୍ୟ ଅତିଥି ଭାବରେ ଯୋଗ ଦେଇଥିଲେ ବଲିଉଡ୍ ଅଭିନେତ୍ରୀ ମହିମା ଚୌଧୁରୀ । ବିଜୟୀ ମଡେଲ୍ ଓ ସଫଳ ମହିଳା ଉଦ୍ୟୋଗୀଙ୍କୁ ପୁରସ୍କାର ଦେବା ସହ ଉତ୍ସାହିତ କରିଥିଲେ । କାର୍ଯ୍ୟକ୍ରମର ପ୍ରଥମ ପର୍ଯ୍ୟାୟରେ ସଂସ୍ଥାର ଲୋଗୋ ଭିଡିଓ ପ୍ରଦର୍ଶନ କରାଯାଇଥିଲା ।
ଏହି କାର୍ଯ୍ୟକ୍ରମ ମାଧ୍ୟମରେ ଆସୁଥିବା ଟଙ୍କାକୁ କର୍କଟ ପୀଡ଼ିତାଙ୍କୁ ପ୍ରଦାନ କରାଯାଇଥାଏ। ନିଆରା ଓ ସୁନ୍ଦର ଲକ୍ଷ୍ୟ ସହ କାର୍ଯ୍ୟକ୍ରମ ହୋଇଥବାବେଳେ ପ୍ରତିଟି ପ୍ରତିଯୋଗୀ ପ୍ରତିଯୋଗିତା ନୁହେଁ ବରଂ ଏକ ମହତ କାର୍ଯ୍ୟର ସମର୍ପଣକୁ ନେଇ ପ୍ରତିଯୋଗିତା କରିଥିଲେ ବୋଲି କହିଛନ୍ତି ଟପ୍ ମଡେଲ ଓଡ଼ିଶାର ସଭାପତି ସବିତା ମହାକୁଡ। ଏଥିରେ ୩ ଟି ବିଭାଗରେ ପ୍ରତିଯୋଗିତା କରିଥିବାବେଳେ ମିସ୍ ଟିନ୍ କାଟେଗୋରୀରେ ବିଜୟୀ ହୋଇଛନ୍ତି ହଂସିକା ଦାସ ଏବଂ ରନର୍ସ ଅପ୍ ହୋଇଛନ୍ତି ଶ୍ରେୟା ପ୍ରିୟଦର୍ଶିନୀ ପରିଡା ଓ ଶ୍ୱେତଲୀନ ସ୍ୱାଇଁ ।
ସେହିପରି ମିସ୍ କାଟେଗୋରୀର ମୁକୁଟ ପିନ୍ଧିଥିଲେ ଅର୍ଚ୍ଚିତା ପଣ୍ଡା, ରନର୍ସ ଅପ୍ ଅନନ୍ୟା ବିଶ୍ୱାଳ ଓ ସୁଶ୍ରୀ ସଂଗୀତା ରାଉତ। ସେହିପରି ମିସେସ୍ କାଟେଗୋରୀର ବିଜେତା ହୋଇଛନ୍ତି ପ୍ରଜ୍ଞା ରାୟ, ରନର୍ସ ଅପ୍ ହୋଇଛନ୍ତି ଯମୁନା ସ୍ୱାଇଁ ଓ ପୁଷ୍ପିତା ମହାପାତ୍ର । ଏହି କାର୍ଯ୍ୟକ୍ରମରେ ପ୍ରତିଭା ଅନ୍ୱେଷଣ ଦାୟିତ୍ୱ ବହନ କରିଥିଲେ ସଂଗୀତ ନିର୍ଦ୍ଦେଶକ ଗୁଡୁଲି ରଥ, ଅଭିନେତ୍ରୀ ଅନୁ ଚୌଧୁରୀ, ଅଭିନେତା ପୁପିନ୍ଦର ସିଂ ଙ୍କ ସହ ଗାୟତ୍ରୀ ବେହେରା ଓ ସସ୍ମିତା ଚୌଧୁରୀ । ପ୍ରଶ୍ନ ଉତ୍ତର ରାଉଣ୍ଡରେ ମହିମା ଚୌଧୁରୀ ମୁଖ୍ୟ ଜଜ୍ ଭାବରେ ରହିଥିଲେ ଓ ପ୍ରତିଯୋଗୀଙ୍କୁ ଉତ୍ସାହିତ କରିଥିଲେ। କାର୍ଯକ୍ରମ ଶେଷରେ ବଛା ବଛା ପ୍ରତିଭାଙ୍କୁ ମହିମା ଚୌଧୁରୀ ପୁରସ୍କୃତ କରିଥିଲେ।
