‘ହାଥରସ୍ ଭୟ’ ନାମରେ କୋଲକାତାରେ ଏକ ବିରୋଧ ପ୍ରଦର୍ଶନ ରାଲି ପରେ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ଉତ୍ତରପ୍ରଦେଶର ବିଜେପି ସରକାର ଏବଂ କେନ୍ଦ୍ର ସରକାରଙ୍କୁ ‘ଦଳିତ, ସଂଖ୍ୟାଲଘୁ ସମ୍ପ୍ରଦାୟ ଏବଂ କୃଷକଙ୍କୁ ନିର୍ଯାତନା’ ପ୍ରସଙ୍ଗ ନେଇ ତୀବ୍ର ସମାଲୋଚନା କରିଛନ୍ତି। ସେ କହିଛନ୍ତି ଯେ କରୋନା ମହାମାରୀ ମଧ୍ୟରେ ବିଜେପିର ଏକଛତ୍ରବାଦୀ କାର୍ଯ୍ୟକଳାପ ନେଇ ବ୍ଲକ୍ ଏବଂ ଜିଲ୍ଲା ସ୍ଥରରେ ବିରୋଧ ରାଲି ଜାରି ରହିବ।
ମମତା କହିଛନ୍ତି, କୋଭିଡ ଏକ ମହାମାରୀ, କିନ୍ତୁ ସବୁଠାରୁ ବଡ ମହାମାରୀ ହେଉଛି ବିଜେପି। ଏହା ଅତ୍ୟାଚାରର ମହାମାରୀ ଅଟେ ଏବଂ ଏହାକୁ ରୋକିବା ପାଇଁ ମୁଁ ସମସ୍ତ ପ୍ରୟାସକୁ ସମର୍ଥନ କରିବି। ସେ ବିଜେପିକୁ ପ୍ରଶ୍ନ କରିଛନ୍ତି ଯେ ତୁମର ପୁଲିସ କଣ ଆମକୁ ପୀଡ଼ିତାଙ୍କ ପରିବାରକୁ ଭେଟିବାକୁ ଦେବ ନାହିଁ? ମୁଁ ଆସନ୍ତାକାଲି ସେହି ପରିବାରକୁ ଭେଟିବି ଏବଂ ତୁମେ ଜାଣି ପାରିବ ନାହିଁ। ସେ ଆହୁରି ମଧ୍ୟ କହିଛନ୍ତି ଯେ ହାଥରସ୍ ଝିଅ ଆମର ବି ଝିଅ। ଯଦି ଆମେ ଦେଶର ଭବିଷ୍ୟତକୁ ଉଜ୍ଜ୍ୱଳ କରିବାକୁ ଚାହୁଁ, ତେବେ ଆମକୁ ଦଳିତ ଏବଂ ସଂଖ୍ୟାଲଘୁ ସମ୍ପ୍ରଦାୟଙ୍କ ପାଖରେ ଛିଡା ହେବାକୁ ପଡିବ। ତୃଣମୂଳ କଂଗ୍ରେସ ମୁଖ୍ୟ ମମତା କହିଛନ୍ତି,’ଆଜି ମୁଁ ହିନ୍ଦୁ ନୁହେଁ, ମୁଁ ଜଣେ ଦଳିତ’।
ଦେଶରେ ଚଳିତ ବର୍ଷ ମାର୍ଚ୍ଚରେ କରୋନା ମହାମାରୀ ଆରମ୍ଭ ହେବା ପରେ ପ୍ରଥମ ଥର ପାଇଁ ସୁଶ୍ରୀ ବାନାର୍ଜୀ ଏହି ସମାବେଶକୁ ସମ୍ବୋଧିତ କରିଥିଲେ। ସୁଶ୍ରୀ ବାନାର୍ଜୀ ମଧ୍ୟ ନିର୍ବାଚନ ପୂର୍ବରୁ ବିଜେପି ବଡ ବଡ କଥା କହିଥିବା ଅଭିଯୋଗ କରିଛନ୍ତି, କିନ୍ତୁ ସେମାନଙ୍କର ପ୍ରକୃତ ଉଦ୍ଦେଶ୍ୟକୁ ଘୋଡାଇ ରଖିଛନ୍ତି। ସେ କହିଛନ୍ତି, ‘ନିର୍ବାଚନ ସମୟରେ ବିଜେପି ନେତାମାନେ ଦଳିତଙ୍କ ଘରକୁ ଯାଆନ୍ତି, ବାହାରୁ ଖାଦ୍ୟ ଆଣି ଖାଆନ୍ତି ଏବଂ ସେମାନେ ଦଳିତ ଘରେ ଖାଇଥିବା ଦାବି କରନ୍ତି। ନିର୍ବାଚନ ପରେ ସେମାନେ ଦଳିତଙ୍କୁ ନିର୍ଯାତନା ଦିଅନ୍ତି ଓ ସେମାନଙ୍କୁ ମାଡ଼ ମାରନ୍ତି।
ସୁଶ୍ରୀ ବାନାର୍ଜୀ କହିଛନ୍ତି ଯେ ବିଜେପି ଦେଶ ପାଇଁ ଲଜ୍ଜା ଆଣିଛି। ଆମ ଝିଅ ସହିତ ଯାହା ଘଟିଛି ତାହା ବିଜେପି ପାଇଁ ଲଜ୍ଜାଜନକ। ସେ କହିଛନ୍ତି,’ମୁଁ ହାଥରସ୍ ପୀଡିତାଙ୍କ ପରିବାର ସହ ଫୋନରେ କଥା ହେବାକୁ ଚାହୁଁଥିଲି, କିନ୍ତୁ ଫୋନ୍ ଛଡ଼ାଇ ନିଆଯାଇଥିଲା।’ ସେ କହିଛନ୍ତି, ଆମେ ନାଟକ ନୁହେଁ, ଦଳିତଙ୍କ ପାଇଁ ନ୍ୟାୟ ଚାହୁଁଛୁ।
