ତିଗିରିଆ: ସାଇକଲ ଚୋରକୁ ଧରି ସ୍ଥାନୀୟ ଲୋକେ ଥାନାରେ ଜିମା ଦେଇଛନ୍ତି। ବାରମ୍ବାର ତିଗିରିଆର ବିଭିନ୍ନ ଅଞ୍ଚଳରୁ ସାଇକଲେ ଚୋରି କରି ନେଇ ବିକ୍ରିକରୁଥିଲା। ସାଇକେଲ ଚୋର ଜଣଙ୍କ ରବିବାର ସକାଳ ପ୍ରାୟ ୧୦ଟା ସମୟରେ ନୂଆପାଟଣା କଳାପାଟ ବଜାରରେ ଏକ ସାଇକେଲ ଚୋରି କରୁଥିବା ବେଳେ ସିସିଟିଭି ଫୁଟେଜରେ ଧରାପଡ଼ିଥିଲା। ଲୋକେ ତାକୁ କାବୁ କରିବା ସହିତ ତିଗିରିଆ ଥାନା ପୁଲିସ ଜିମା ଦେଇଥିଲେ। ସାଇକେଲ ଚୋରିକୁ ଅଭ୍ୟାସରେ ପରିଣତ କରିଥିବା ବ୍ୟକ୍ତି ଜଣଙ୍କ ଆଠଗଡ଼ ଥାନା ଅନ୍ତର୍ଗତ ଜାଗିଆପଡ଼ା ଗ୍ରାମର ଶ୍ରୀକାନ୍ତ ଖଟୁଆ ଓରଫ ବୁଦ୍ଧିଆ ବୋଲି ଥାନା ଅଧିକାରୀ ସୁଚିତ୍ରା ଜେନା ସୂଚନା ଦେଇଛନ୍ତି। ଉକ୍ତ ଯୁବକ ଜଣଙ୍କ ଗତ କିଛିଦିନ ମଧ୍ୟରେ ୫ଟି ସାଇକେଲ ଚୋରି କରିଥିବା ପୁଲିସ ଆଗରେ ପ୍ରକାଶ କରିଛି। ପୁଲିସ ବୁଦ୍ଧିଆକୁ ନେଇ ବିଭିନ୍ନ ସ୍ଥାନରେ ଚଢ଼ାଉ କରିବା ସହିତ ୫ଟି ଚୋରି ସାଇକେଲ ଜବତ କରାଯାଇଥିବା ଜଣାପଡ଼ିଛି। ଚଳିତ ମାସ ଗତ ୧୩ ତାରିଖରେ ତିଗିରିଆ ନିଜିଗଡ଼ ଠାରୁ ଏକ ସ୍କୁଲ ପିଲାର ସାଇକେଲ ଚୋରି ହୋଇଥିବା ନେଇ ଥାନାରେ ଲିଖିତ ଅଭିଯୋଗ ହୋଇଥିଲା।
Comments are closed.