ବସ୍‌ ଧକ୍କାରେ ସ୍କୁଟି ଚାଳକ ଗୁରୁତର

ତିଗିରିଆ: ଖୁଣ୍ଟୁଣୀ-ନରସିଂହପୁର ରାଜ୍ୟ ରାଜପଥର ତିଗିରିଆ ଥାନା ଅନ୍ତର୍ଗତ ନୂଆସଡ଼କ ଠାରେ ରବିବାର ସନ୍ଧ୍ୟାରେ ଏକ ବସ୍‌ ଧକ୍କାରେ ଜଣେ ସ୍କୁଟି ଚାଳକ ଗୁରୁତର ଆହତ ହୋଇଥିବା ଜଣାପଡ଼ିଛି । ଖବର ମୁତାବକ ନରସିଂହପୁରରୁ କଟକ ଅଭିମୁଖେ ଯାଉଥିବା ମହାବୀର ନାମକ ଏକ ବସ୍‌ ଆଠଗଡ଼ ପଟୁ ସ୍କୁଟି ଚଳାଇ ଆସୁଥିବା ବାଙ୍କୀ ରଣପୁର ଗ୍ରାମର ଦିଲ୍ଲୀପ ଦଳେଇ (୩୫)ଙ୍କୁ ଧକ୍କା ଦେଇଥିଲା ।

ଘଟଣାସ୍ଥଳରେ ସ୍କୁଟି ଚାଳକ ରାସ୍ତାରେ ଛିଟିକ୍‌ ପଡ଼ି ଗୁରୁତର ଭାବେ ଆହତ ହୋଇଛନ୍ତି । ତାଙ୍କୁ ସ୍ଥାନୀୟ ଲୋକେ ଉଦ୍ଧାର କରି ତୁରନ୍ତ ତିଗିରିଆ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ସେଠାରେ ପ୍ରାଥମିକ ଚିକିତ୍ସା ପରେ ଅଧିକ ଚିକିତ୍ସା ପାଇଁ ଆଠଗଡ଼ ଉପଖଣ୍ଡ ଡାକ୍ତରଖାନାକୁ ସ୍ଥାନାନ୍ତର ହୋଇଥିବା ଜଣାପଡ଼ିଛି । ଖବର ପାଇ ତିଗିରିଆ ଥାନା ପୁଲିସ ଘଟଣାସ୍ଥଳରେ ପହଞ୍ଚି ଉଭୟ ଗାଡ଼ିକୁ ଜବତ କରି ତଦନ୍ତ ଚଳାଇଛି ।