ଟିଟିଲାଗଡ଼ : ଦାଦନଗଡ଼ ଟିଟିଲାଗଡ଼ ନିର୍ବାଚନ ମଣ୍ଡଳୀରେ ଧାନ କଟା ପରେ ଦାଦନ ଚାଲାଣ ଜୋର ଧରିଛି । କ୍ଷୁଦ୍ର ଚାଷୀ ଧାନ ଅମଳ ପରେ ଦଲାଲକୁ ବିକ୍ରି ସହ ହାତରେ କାମ ନଥିବା ବେଳେ ସୁଯୋଗ ଉଣ୍ଡୁଥିବା ଶ୍ରମିକ ଦଲାଲଙ୍କ ଶିକାର ହେଉଛନ୍ତି । ସେହିପରି ମନରେଗା ହାସ୍ୟରେ ପଡି ଗାଁ ଶ୍ରମିକଙ୍କ ହାତରେ ମଧ୍ୟ କୌଣସି କାମ ଧନ୍ଦା ନାହିଁ । ଏଭଳିସ୍ଥିତିରେ ଟିଟିଲାଗଡ଼ ଥାନା ଅନ୍ତର୍ଗତ ବୁର୍ଡିପଡା ଗ୍ରାମ ନିକଟରୁ ଦଲାଲ ଦ୍ୱାରା ଚାଲାଣ ହେବାକୁ ରଖାଯାଇଥିବା ଶ୍ରମିକଙ୍କୁ ବୁଧବାର ରାତ୍ରିରେ ଟିଟିଲାଗଡ଼ ପୁଲିସ ଉଦ୍ଧାର କରିବା ଆଲୋଚନାର ବିଷୟ ହୋଇଛି । ପୁଲିସ ୫ ଶିଶୁ, ୩ ନାବାଳିକା, ୧୦ ମହିଳାଙ୍କ ସମେତ ମୋଟ ୩୫ ଜଣ ଶ୍ରମିକଙ୍କୁ ଉଦ୍ଧାର କରିଛି ।
ଶ୍ରମିକ ଟିଟିଲାଗଡ଼ ନିର୍ବାଚନ ମଣ୍ଡଳୀ ଅନ୍ତର୍ଗତ ଗୁଡଭେଲା ବ୍ଲକର ଗୁଡଭେଲା ଏବଂ ଜାମୁଟ ଗ୍ରାମର ବୋଲି ଜଣାପଡିଛି । ଉଦ୍ଧାର ପରେ ସେମାନଙ୍କୁ ଟିଟିଲାଗଡ଼ ଥାନାରେ ରଖାଯାଇଥିବା ବେଳେ ଶ୍ରମ ଅଧିକାରୀଙ୍କୁ ସୂଚିତ ସହ ସେମାନଙ୍କୁ ଘରକୁ ପଠାଯିବ ବୋଲି ଥାନା ଆଇଆଇସି ବିଶ୍ୱଜିତ ମନବୋଧ କହିଛନ୍ତି । ଉଦ୍ଧାର ଶ୍ରମିକଙ୍କ କହିବା ଅନୁସାରେ ଦଲାଲ ସେମାନଙ୍କୁ ଜଣ ପ୍ରତି ୪୦ ହଜାର ଟଙ୍କା ବଇନା ଦେବ ବୋଲି ପ୍ରତିଶ୍ରୁତି ଦେଇଥିଲା । ଅନ୍ୟପକ୍ଷରେ ଦାଦନ ସର୍ଦ୍ଦାର ଫେରାର ହେବାକୁ ସକ୍ଷମ ହୋଇଛି ।
