ଚୌଦ୍ୱାର : ୫୫ ନମ୍ବର ଜାତୀୟ ରାଜପଥର ଚୌଦ୍ୱାର ଥାନା ଅନ୍ତର୍ଗତ ନୁନଟିକିରି ଛକରୁ ଚୋରି ଯାଇଥିବା ଏକ ଟ୍ରକକୁ ପୁଲିସ ଜବତ କରିବା ସହିତ ଟ୍ରକ ଚୋରି ଅଭିଯୋଗରେ ଜଣକୁ ଗିରଫ କରି କୋର୍ଟଚାଲାଣ କରିଛି । ଅଭିଯୁକ୍ତ ଜଣକ ହେଲେ କଟକ ଜିଲ୍ଲା ନରସିଂହପୁର ଥାନା କାକୁଡିଆ ଗ୍ରାମର ମୀନକେତନ ସାହୁ । ପୁଲିସ ସୂଚନା ଅନୁଯାୟୀ ଜଗତସିଂପୁର ଅଞ୍ଚଳର ଗାଡି ମାଲିକ ପଙ୍କଜ ମଣ୍ଡଳ ଗତ ୧୦ ତାରିଖରେ ଥାନାରେ ଆଭିଯୋଗ କରିଥିଲେ ଯେ ଚୌଦ୍ୱାର ନୁନଟିକିରି ଅଞ୍ଚଳର ଡ୍ରାଇଭର ବିଶ୍ୱଜିତ ରାଉତ ତାଙ୍କର ଏକ ଟାଟା ୧୦ଚକିଆ ଟ୍ରକ ଚଳାଉଥିବା ବେଳେ ୬ ତାରିଖ ରାତିରେ ସେ ଟ୍ରକକୁ ନୁନଟିକିରି ଛକରେ ରଖି ଘରକୁ ଯାଇଥିବାବେଳେ ସେହି ରାତିରେ କେହି ତାଙ୍କ ଟ୍ରକକୁ ଚୋରି କରି ନେଇଯାଇଥିଲେ। ଅଭିଯୋଗ ପାଇ ପୁଲିସ ଘଟଣାର ତଦନ୍ତ ଜାରୀ ରଖିଥିଲା । ଏସ୍ ଆଇ ନିରଞ୍ଜନ ଭୋଇ ବିଭିନ୍ନ ଆଧାରରେ ସୂଚନା ନେଇ ସୋମବାର ଦିନ ନୂଆ ପାଟଣା ଡାକ ବଙ୍ଗଳା ନିକଟ ପାହାଡ଼ ପାଖରୁ ଟ୍ରକକୁ ଜବତ କରିବା ସହିତ ଅଭିଯୁକ୍ତକୁ ଗିରଫ କରିଥିଲେ । ଏହି ଘଟଣାରେ ଭିକି ନାମକ ଅନ୍ୟଜଣେ ଅଭିଯୁକ୍ତ ସଂପୁକ୍ତ ଥିବା ଓ ସେ ଫେରାର ଥିବା ପୁଲିସ ସୂଚନା ଦେଇଛି । ଅଭିଯୁକ୍ତ ମୀନକେତନ ନାମରେ ଟାଙ୍ଗୀ, ଜଗତପୁର ଓ ଗୁରୁଡିଝାଟିଆ ଥାନାରେ ବିଭିନ୍ନ ଅପରାଧିକ ମାମଲା ରହିଥିବା ଜଣା ପଡ଼ିଛି।
Comments are closed.