ପଶ୍ଚିମବଙ୍ଗ ହୁଗୁଳି ଜିଲାର କାମାରପୁକୁର ଗାଁରେ ରାମକୃଷ୍ଣ ୧୮୩୬ ମସିହା ଫେବୃୟାରୀ ୧୮ରେ ଜନ୍ମଗ୍ରହଣ କରିଥିଲେ। ବାପା-ମା’ ତାଙ୍କ ନାଁ ଶ୍ରଦ୍ଧାରେ ଗଦାଧର ଦେଇଥିଲେ। ପିଲାଟିଦିନରୁ ସେ ଭାରି ଈଶ୍ବରବିଶ୍ବାସୀ ଥିଲେ। ଅତି କମ୍ ବୟସରେ ତାଙ୍କ ବାପାଙ୍କର ପରଲୋକ ହେବାରୁ ଗଦାଧର ପାଠପଢ଼ା ପ୍ରତି ମନ ନ ଦେଇ ଯୋଗଧ୍ୟାନ ପ୍ରତି ଆଗ୍ରହୀ ହେଲେ। ପୌରାଣିକ ବହି ପଢ଼ାରେ ସେ ମନ ଦେଉଥିଲେ। ଚିତ୍ର ଅଙ୍କାରେ ବି ତାଙ୍କର ଖୁବ୍ ରୁଚି ଥିଲା।
ଗଙ୍ଗାନଦୀ କୂଳରେ ଥିବା ଦକ୍ଷିଣେଶ୍ବର ମା’ କାଳୀଙ୍କର ମନ୍ଦିରରେ ତାଙ୍କ ବଡ଼ଭାଇ ପୂଜକ ଥିଲେ। ଗଦାଧର ମଧ୍ୟ ତାଙ୍କ ସାଙ୍ଗରେ ଯାଉଥିଲେ। ସେଇଠାରେ ସେ ମା’ କାଳୀଙ୍କର ପରମଭକ୍ତ ପାଲଟିଲେ।
ପରେ ଜଣେ ସନ୍ନ୍ୟାସୀଙ୍କ ନିକଟରୁ ଦୀକ୍ଷା ନେଇ ସେ ରାମକୃଷ୍ଣ ପରମହଂସ ହୋଇଥିଲେ। ୧୮୮୬ ମସିହା ଅଗଷ୍ଟ ୧୬ରେ ରାମକୃଷ୍ଣ ପରମହଂସ ଶରୀର ତ୍ୟାଗ କରିଥିଲେ। ତାଙ୍କ ପ୍ରଧାନଶିଷ୍ୟ ସ୍ବାମୀ ବିବେକାନନ୍ଦ ଗୁରୁଙ୍କ ନାମରେ ‘ରାମକୃଷ୍ଣ ମିଶନ୍’ ପ୍ରତିଷ୍ଠା କରିଥିଲେ, ଏହି ମିଶନ୍ ଜରିଆରେ ଅସହାୟଲୋକଙ୍କ ସେବା କରାଯାଉଛି।
Comments are closed.