ଠାକୁରମୁଣ୍ଡା : ଠାକୁରମୁଣ୍ଡା ବ୍ଲକ ଅଞ୍ଚଳର ବିଭିନ୍ନ ସାପ୍ତାହିକ ହାଟଗୁଡ଼ିକରେ ଚାଲିଛି ଜୁଆ ଖେଳ। ଏଥିରେ ହଜାର ହଜାର ଟଙ୍କାର ବାଜି । ଜୁଆଖେଳ ନାଁରେ ଚାଲିଛି ହଜାର ହଜାର ଟଙ୍କାର ବେଆଇନ କାରବାର । ସବୁଠାରୁ ଆଶ୍ଚର୍ଯ୍ୟର କଥା ଥାନାଠାରୁ ମାତ୍ର ତିନି ଶହ ମିଟର ଦୂରରେ ମହୁଲଡିହା ସାପ୍ତାହିକ ହାଟରେ ମଝିରେ ଏପରି ଖୁଲମଖୁଲା ଚାଲିଛି ଜୁଆଖେଳ । ସେହିପରି ନଂ ୫୩ ରାଜ୍ୟ ରାଜପଥ ମହୁଲଡିହା, ଠାକୁରମୁଣ୍ଡା-କରଞ୍ଜିଆ ରାସ୍ତା ଦେଇ ଚାଲିଛି ଗୋ ଚାଲାଣ। ଏସବୁ ସମସ୍ତଙ୍କ ସାମ୍ନାରେ ପୁରା ଖୋଲାମେଲାରେ ଚାଲିଥିଲେ ମଧ୍ୟ ସବୁ ଜାଣି ନିଦାବିଷ୍ଣୁ ସାଜିଛି ପୁଲିସ । ମହୁଲଡିହା ଓ ଠାକୁରମୁଣ୍ଡା ଥାନା ଅଧିନରେ ଥିବା ବିଭିନ୍ନ ସାପ୍ତାହିକ ହାଟମାନଙ୍କରେ ଚାଲିଛି ଖୋଲାଖୋଲି ଜୁଆଖେଳ । ଏହି ଜୁଆଖେଳ ସ୍ଥାନୀୟ ଭାଷାରେ ଧୁଣ୍ଡି ପାଲି ଖେଳ ନାଁରେ ଜଣାଶୁଣା ।
ଏକ ଝୁଡିରେ କିଛି ଲୁଡୁ ଗୋଟି ରଖାଯାଇ ତାହାକୁ ନେଇ ଖେଳ କରିଥାନ୍ତି । ଆଉ କେଉଁଥର କେଉଁ ନମ୍ବର ଉପରେ ରହିବ ତାହା ନ ଦେଖି ଟଙ୍କା ବାଜି ଲଗାଉଛନ୍ତି ଲୋକେ । ଖୋଲାଖୋଲି ହାଟ ଭିତରେ ଏହି ଖେଳ ଚାଲିଥିବା ବେଳେ ପ୍ରତ୍ୟେକ ହାଟ ବାରିରେ ହଜାର ହଜାର ଟଙ୍କା ଏହି ଜୁଆଖେଳରେ ଉଡାଯାଉଛି । ହେଲେ ପୁଲିସ ଚଢାଉ କରୁନାହିଁ କିମ୍ବା ଜୁଆଖେଳକୁ ବନ୍ଦ କରୁନାହିଁ । ଯାହାଫଳରେ ଅଞ୍ଚଳରେ ଅନେକ ସମୟରେ ଅପରାଧ ମଧ୍ୟ ହେଉଥିବା ପୂର୍ବରୁ ନଜିର ରହିଛି ।
