ସମାଜ ଡିଜିଟାଲ ଡେସ୍କ: ବ୍ରିସବେନରେ ଚାଲିଥିବା ୩ୟ ଟେଷ୍ଟ ମ୍ୟାଚରେ ଭାରତ ଜଟିଳ ସ୍ଥିତିରେ ରହିଛି। ଅଷ୍ଟ୍ରେଲିଆର ପ୍ରଥମ ଇନିଂସ ୪୪୫ ରନ ଜବାବରେ ଭାରତ ଏହାର ପ୍ରଥମ ପାଳିରେ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଛି। ମାତ୍ର ୪୪ ରନରେ ଦଳ ୪ଟି ଉଇକେଟ ହରାଇଛି।
ଗୋଲାପୀ ବଲରେ ଖେଳାଯାଉଥିବା ଏହି ଦିବାରାତ୍ର ମ୍ୟାଚରେ ଭାରତ ଟସ ଜିତି ବୋଲିଂ ନିଷ୍ପତ୍ତି ନେଇଥିଲା। ଯଶପ୍ରୀତ ବୁମରାଙ୍କ ଚମତ୍କାର ବୋଲିଂ ସତ୍ବେ ଭାରତ ଅଷ୍ଟ୍ରେଲିଆକୁ ଅଟକାଇବାରେ ବିଫଳ ହୋଇଥିଲା। ଷ୍ଟିଭ ସ୍ମିଥ(୧୦୧ରନ) ଏବଂ ଟ୍ରାଭିସ ହେଡ୍(୧୫୨ରନ)ଙ୍କ ଦମଦାର ଶତକ ଏବଂ ଆଲେକ୍ସ କ୍ୟାରିଙ୍କ ୭୦ ରନ ବଳରେ ଦଳ ୪୪୫ ରନର ବିଶାଳ ସ୍କୋର କରିବାରେ ସମର୍ଥ ହୋଇଥିଲା। ଭାରତ ପକ୍ଷରୁ ବୁମରା ସର୍ବାଧିକ ୬ ଉଇକେଟ ନେଇଥିଲାବେଳେ ମହମ୍ମଦ ସିରାଜ ୨ଟି ଏବଂ ଆକାଶ ଦୀପ ଓ ନିତିଶ କୁମାର ରେଡ୍ଡୀ ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ।
ତେବେ ଭାରତ ପ୍ରଥମ ପାଳି ବ୍ୟାଟିଂ ଆରମ୍ଭ କରିବା କ୍ଷଣି ବିପର୍ଯ୍ୟୟର ସମ୍ମୁଖୀନ ହୋଇଛି। ଯଶ୍ଵସ୍ଵୀ ଜୟସଓ୍ବାଲ ୨ଟି ବଲରୁ ୪ ରନ କରି ଆଉଟ ହୋଇଯାଇଥିଲେ। ପରେ ପରେ ଶୁବମନ ଗିଲ ୧ ରନ, ବିରାଟ କୋହଲି ୩ ରନ ଏବଂ ରୁଷଭ ପନ୍ତ ୯ ରନ କରି ଆଉଟ୍ ହୋଇଯାଇଥିଲେ। କେ.ଏଲ. ରାହୁଲ ୩୦ ଏବଂ ରୋହିତ ଶର୍ମା ବିନା କୌଣସି ରନରେ ଅପରାଜିତ ରହିଛନ୍ତି। ସିରିଜରେ ଭାରତ ଏବଂ ଅଷ୍ଟ୍ରେଲିଆ ଗୋଟିଏ ଲେଖାଏ ମ୍ୟାଚ ଜିତି ୧-୧ରେ ରହିଛନ୍ତି।
Comments are closed.