ସମାଜ ଡିଜିଟାଲ ଡେସ୍କ: କେନ୍ଦ୍ରୀୟ ଇସ୍ରାଏଲରେ ଅବସ୍ଥିତ ଆଇଡିଏଫର ଗ୍ଲିଲଟ୍ ସୈନ୍ୟ ଶିବିର ବାହାରେ ରବିବାର ଆତଙ୍କବାଦୀ ଆକ୍ରମଣ ହୋଇଛି। ଶିବିର ନିକଟରେ ଥିବା ଏକ ବସ ରହଣି ସ୍ଥଳରେ ଏକ ସନ୍ଦିଗ୍ଧ ଆତଙ୍କୀ ଟ୍ରକ ସହାୟତାରେ ଦୁର୍ଘଟଣା ଘଟାଇଛି। ବସ ରହଣି ସ୍ଥଳରେ ଅପେକ୍ଷାରତ ଯାତ୍ରୀମାନଙ୍କ ଉପରେ ଟ୍ରକ ଚଢ଼ାଇ ହତ୍ୟା କରିବାକୁ ଉଦ୍ୟମ କରାଯାଇଛି। ଏହି ଘଟଣାରେ ୩୫ ଯାତ୍ରୀ ଆହତ ହୋଇଥିବାବେଳେ ୬ ଜଣଙ୍କ ଅବସ୍ଥା ସଙ୍କଟାପନ୍ନ ରହିଛି। ସୁରକ୍ଷା କର୍ମୀମାନେ ଉକ୍ତ ଟ୍ରକ ଡ୍ରାଇଭରକୁ ଗୁଳି କରି ନିପାତ କରିଛନ୍ତି। ଏହା ଏକ ଯୋଜନାବଦ୍ଧ ଆତଙ୍କବାଦୀ ଆକ୍ରମର ବୋଲି ପୁଳିସ ସନ୍ଦେହ କରୁଛି।
ପୁଲିସ ସୂଚନା ଅନୁସାରେ, ରହଣି ସ୍ଥଳ ନିକଟରେ ଏକ ବସ ଅଟକି ଯାତ୍ରୀମାନଙ୍କୁ ଓହ୍ଲାଇଥିଲା। ଏହା ସହିତ ସେଠାରେ କିଛି ଯାତ୍ରୀ ବସରେ ଚଢ଼ିବାକୁ ଅପେକ୍ଷା କରିଥିଲେ। ଏହି ସମୟରେ ଦ୍ରୁତଗତିରେ ଏକ ଟ୍ରକ ଆସି ଯାତ୍ରୀମାନଙ୍କ ଉପରେ ଚଢ଼ାଇ ଦେଇଥିଲା।
Comments are closed.