ସମ୍ବଲପୁର: ସମଗ୍ର ଓଡ଼ିଶାରେ ଖରିଫ ଧାନ ବିକ୍ରି ପାଇଁ ଗତ ୧୯ ତାରିଖଠାରୁ ଚାଷୀ ପଞ୍ଜୀକରଣ ଆରମ୍ଭ ହୋଇଛି । ତେବେ ଦୁଇ ସପ୍ତାହ ପରେ ମଧ୍ୟ ମାତ୍ର ୩୦ ପ୍ରତିଶତ ଚାଷୀ ପଞ୍ଜୀକରଣ ହୋଇପାରି ନାହିଁ। ଏହାର ପ୍ରମୁଖ କାରଣ ହେଉଛି ଚଳିତବର୍ଷ ମିଳିତ ଅଧିକାରଭୁକ୍ତ ଜମିପଟ୍ଟାରେ ନାମ ଥିବା ସମସ୍ତଙ୍କ ଦସ୍ତଖତ ଆବଶ୍ୟକ ହେଉଥିବା ବେଳେ ଇ-କେୱାଇସି ନାମରେ ପ୍ରକ୍ରିୟା ପୂର୍ବାପେକ୍ଷା ଖୁବ୍ ଅଧିକ ଜଟିଳ ହୋଇଛି। ଏହାକୁ ନେଇ ଚାଷୀ ମହଲରେ ଅସନ୍ତୋଷ ପ୍ରକାଶ ପାଇଛି। ବିଶେଷକରି ପିଢ଼ି ପିଢ଼ି ଧରି ଅବିଭାଜିତ ଜମିର ଉତ୍ତରାଧିକାର ସୂତ୍ରରେ ଏବେ ତୃତୀୟ ପିଢ଼ି ହାତରେ ଥିବା ବେଳେ ପଟ୍ଟାଧାରୀ ବ୍ୟକ୍ତିଙ୍କ କେବେ ଠାରୁ ପରଲୋକ ହୋଇଗଲାଣି। ତେଣୁ ଏଭଳି ସ୍ଥିତିରେ ସମସ୍ତ ଉତ୍ତରାଧିକାରୀଙ୍କ ଦସ୍ତଖତ ଆବଶ୍ୟକ ହେଉଥିବାରୁ ଚାଷୀଙ୍କୁ ନାହିଁ ନ ଥିବା ସମସ୍ୟାର ସମ୍ମୁଖୀନ ହେବାକୁ ପଡ଼ୁଛି। ରାଜ୍ୟ ସରକାରଙ୍କ ବିଜ୍ଞପ୍ତି ଅନୁସାରେ ଜୁଲାଇ ୧୯ରୁ ଅଗଷ୍ଟ ୨୦ ତାରିଖ ପର୍ଯ୍ୟନ୍ତ ଚାଷୀ ପଞ୍ଜୀକରଣ କରାଯିବ। ହେଲେ ଦୁଇସପ୍ତାହ ପରେ ମଧ୍ୟ ଅଧିକାଂଶ ଚାଷୀ ପଞ୍ଜୀକରଣ ପାଇଁ ରାଜସ୍ବ ମଣ୍ଡଳ କାର୍ଯ୍ୟାଳୟ, ବ୍ୟାଙ୍କ, ଆଧାର କେନ୍ଦ୍ର ଧାଇଁ ଧାଇଁ ନୟାନ୍ତ ହେଉଛନ୍ତି। ଗତବର୍ଷ ଖରିଫଋତୁରେ ସମ୍ବଲପୁର ଜିଲାରେ ୫୯,୯୦୦ ଚାଷୀ ପଞ୍ଜିକୃତ ହୋଇଥିବା ବେଳେ ଅଦ୍ୟାବଧି ମାତ୍ର ୨୨,୨୮୬ ଚାଷୀ ପଞ୍ଜୀକରଣ କରିପାରିଥିବା ସରକାରୀ ସୂତ୍ରରୁ ଜଣାପଡିଛି।
ଚାଷୀ ପଞ୍ଜୀକରଣରେ ଜଟିଳ ପ୍ରକ୍ରିୟାକୁ ନେଇ ରାଜସ୍ବମନ୍ତ୍ରୀ ସୁରେଶ ପୂଜାରୀଙ୍କ ଦୃଷ୍ଟି ଆକର୍ଷଣ କରିବାରୁ ପଞ୍ଜୀକରଣ ପ୍ରକ୍ରିୟାରେ ଏଥର ସରଳୀକରଣ କରାଯାଉଛି। ତେଣୁ ସିଧାସଳଖ ଚାଷୀଙ୍କ ଖାତାକୁ ଯେମିତି ଧାନବିକ୍ରି ଟଙ୍କା ଯିବ ସେଥିପାଇଁ ଏହି ବ୍ୟବସ୍ଥା ହୋଇଛି ବୋଲି ମନ୍ତ୍ରୀ ଶ୍ରୀ ପୂଜାରୀ କହିଛନ୍ତି।
ସିଧାସଳଖ ଚାଷୀଙ୍କ ଖାତାକୁ ଯିବ ଧାନ ବିକ୍ରି ଟଙ୍କା : ମନ୍ତ୍ରୀ
Popular Categories
Previous article
Next article