ନୂଆଦିଲ୍ଲୀ : ଆଧାର ସଂଶୋଧନ ଆଇନ ବିରୋଧୀ ଏକ ଆବେଦନ ଉପରେ ସର୍ବୋଚ୍ଚ ଅଦାଲତ ଶୁଣାଣି କରି ଶୁକ୍ରବାର କେନ୍ଦ୍ର ସରକାରକୁ ନୋଟିସ ଜାରି କରିଛନ୍ତି। ଜୁଲାଇରେ ସଂସଦରେ ଗୃହୀତ ଏହି ସଂଶୋଧିତ ଆଇନ କ୍ରମେ ଘରୋଇ କମ୍ପାନୀଗୁଡିକୁ ଆଧାର ସମ୍ବନ୍ଧୀୟ ତଥ୍ୟ ବ୍ୟବହାର ଅନୁମତି ପ୍ରଦାନ କରାଯାଇଛି। ଏହାକୁ ବିରୋଧ କରି ଅବସରପ୍ରାପ୍ତ ସେନା ଅଧିକାରୀ ଏସ.ଜି. ଭୋମ୍ବାଟକେରେ ଏବଂ ମାନବିକ ଅଧିକାର କମିସନ ବେଜୱାଡା ୱିଲସନ ଅଗଷ୍ଟରେ ସର୍ବୋଚ୍ଚ ଅଦାଲତରେ ଆବେଦନ କରିଥିଲେ। ଏହାଦ୍ବାରା ସରକାର ଓ ଘରୋଇ କମ୍ପାନୀଗୁଡିକ ନାଗରିକଙ୍କ ବ୍ୟକ୍ତିଗତ ତଥ୍ୟ ହାସଲ କରିବା ସହିତ ସେମାନଙ୍କ ଉପରେ ଏକପ୍ରକାର ନଜର ରଖିବାର ସୁଯୋଗ ପାଇବେ ବୋଲି ଆବେଦନକାରୀ ଯୁକ୍ତି ଦର୍ଶାଇଥିଲେ। ପ୍ରଧାନ ବିଚାରପତି ଏସ. ଏ. ବୋବଡେ ଏବଂ ଜଷ୍ଟିସ ବି.ଆର. ଗଭଇଙ୍କ ପୀଠ ଏହି ଆବେଦନର ଶୁଣାଣି କରି କେନ୍ଦ୍ର ସରକାରଙ୍କୁ ନୋଟିସ ଜାରି କରିଛନ୍ତି। ଆଧାର ସଂଶୋଧନ ଉପରେ ପୂର୍ବରୁ ଜାରି କରାଯାଇଥିବା ଅଧ୍ୟାଦେଶକୁ ଚ୍ୟାଲେଞ୍ଜ କରି ହୋଇଥିବା ଆବେଦନକୁ ମଧ୍ୟ ଏହା ସହିତ ସାମିଲ କରାଯାଇଛି।
Comments are closed.