ନୂଆଦିଲ୍ଲୀ: ୨୦୧୨ ନିର୍ଭୟା ମାମଲାର ଅନ୍ୟତମ ଦୋଷୀ ଅକ୍ଷୟ କୁମାର ସିଂହଙ୍କ ସମୀକ୍ଷା ଆବେଦନ ଉପରେ ସୁପ୍ରିମକୋର୍ଟ ଆସନ୍ତା ୧୭ ତାରିଖରେ ଶୁଣାଣି କରିବେ। କୋର୍ଟଙ୍କ ୩ ଜଣିଆ ଖଣ୍ଡପୀଠ ୧୭ ତାରିଖ ଅପରାହ୍ନ ୨ଟାରେ ଅକ୍ଷୟଙ୍କ ଆବେଦନର ଶୁଣାଣି କରିବେ ବୋଲି ଗୁରୁବାର ଘୋଷଣା କରିଛନ୍ତି। ତେବେ ଏହା ପୂର୍ବରୁ ପଟିଆଲା କୋର୍ଟ ମାମଲାର ସମସ୍ତ ପକ୍ଷଙ୍କୁ ଶୁକ୍ରବାର ହାଜର ହେବାକୁ ନିର୍ଦେଶ ଦେଇଛନ୍ତି। ଶୁକ୍ରବାର ପୂର୍ବାହ୍ନ ଠିକ୍ ୧୦ଟାରେ ସବୁ ପକ୍ଷ କୋର୍ଟ ରୁମରେ ହାଜର ହେବାକୁ କୁହାଯାଇଛି। ତେବେ ସୁରକ୍ଷା ଦୃଷ୍ଟିକୋଣରୁ ଦୋଷୀମାନେ ଭିଡିଓ କନ୍ଫରେନ୍ସ ଜରିଆରେ ହାଜର ହେବେ।
ତିହାର ଜେଲ ମହାନିର୍ଦେଶକ କହିଛନ୍ତି ଯେ, ଜେଲ କର୍ତ୍ତୃପକ୍ଷ ପଟିଆଲା କୋର୍ଟରେ ଏକ ଷ୍ଟାଟସ ରିପୋର୍ଟ ଦାଖଲ କରିବେ। ଏଥିରେ ରାଜକ୍ଷମା ପାଇଁ ଆବେଦନ କରିଥିବା ଦୋଷୀ ବିନୟ ଏବଂ ଅକ୍ଷୟଙ୍କୁ ବାଦ୍ ଦିଆଯିବ। ଅନ୍ୟ ଦୋଷୀମାନେ ବର୍ତ୍ତମାନ ସୁଦ୍ଧା ରାଜକ୍ଷମା ଆବେଦନ କରିନାହାନ୍ତି। ବିନୟଙ୍କ ରାଜକ୍ଷମା ଆବେଦନ ରାଷ୍ଟ୍ରପତିଙ୍କ ନିକଟରେ ରହିଛି।
ସୂଚନାଯୋଗ୍ୟ, ୨୦୧୨ ନିର୍ଭୟା ଗଣବଳାତ୍କାର ଓ ହତ୍ୟା ମାମଲାରେ ୬ ଅଭିଯୁକ୍ତ ଦୋଷୀ ସାବ୍ୟସ୍ତ ହୋଇଥିଲେ। ସେମାନଙ୍କ ମଧ୍ୟରୁ ଜଣେ ନାବାଳକ ଥିବାରୁ ତାଙ୍କୁ ଥଇଥାନ କେନ୍ଦ୍ରରେ ରଖାଯାଇଛି। ଅନ୍ୟତମ ଅଭିଯୁକ୍ତ ରାମ ସିଂହ ତିହାର ଜେଲରେ ଆତ୍ମହତ୍ୟା କରିଥିବାବେଳେ ଅନ୍ୟ ୪ ଅଭିଯୁକ୍ତଙ୍କୁ ମୃତ୍ୟୁ ଦଣ୍ଡାଦେଶ ଦିଆଯାଇଛି। ସେମାନେ ହେଲେ ପୱନ ଗୁପ୍ତା, ଅକ୍ଷୟ କୁମାର ସିଂହ, ବିନୟ ଶର୍ମା, ମୁକେଶ ସିଂହ।
Comments are closed.