କଟକ : ଅନୁସୂଚିତ ଜାତି ଓ ଜନଜାତି ଅତ୍ୟାଚାର ନିରୋଧ ଆଇନରେ ପରିବର୍ତ୍ତନ ପାଇଁ ସୁପ୍ରିମକୋର୍ଟଙ୍କ ନିର୍ଦେଶ ବିରୋଧରେ ସାରା ଦେଶରେ ବିଭିନ୍ନ ଦଳିତ ସଂଗଠନ ପକ୍ଷରୁ ବନ୍ଦ ପାଳନ କରାଯାଇଛି ।
ସୋମବାର ସକାଳେ ରାଜସ୍ଥାନର ଭରତପୁରଠାରେ ମହିଳାମାନେ ହାତରେ ବାଡ଼ି ଧରି ରାସ୍ତା ଅବରୋଧ କରିଛନ୍ତି। ସେହିପରି ବାଡ଼ମେରଠାରେ ବନ୍ଦ ସପକ୍ଷବାଦୀ ଓ ପୁଲିସ ମଧ୍ୟରେ ଖଣ୍ଡଯୁଦ୍ଧରେ ୨୫ଜଣ ଆହତ ହୋଇଛନ୍ତି। ପଞ୍ଜାବ ପଟିଆଲାରେ ମଧ୍ୟ ଟ୍ରେନ ରୋକ କରାଯିବା ସହ ଏଥିରେ ବ୍ୟାପକ ଅନୁପାତରେ ମହିଳା ସାମିଲ ଥିବା ପରିଲକ୍ଷିତ ହୋଇଥିଲା। ସେହିପରି ବିହାର ରାଜ୍ୟର ଆରାରିଆ, ସୁପୋଲ, ମଧୁବନୀ, ଦରଭଙ୍ଗା, ଜହାନାବାଦ୍ ଓ ଆରା ପରି ଅଞ୍ଚଳରେ ମଧ୍ୟ ଟ୍ରେନ ଚଳାଚଳ ପ୍ରଭାବିତ ହେବା ସହ ରାସ୍ତା ଅବରୋଧ ହୋଇଥିଲା।
ସେହିପରି ଓଡ଼ିଶାର ସମ୍ବଲପୁର, ରାଉରକେଲା, ବଲାଙ୍ଗିରରେ ମଧ୍ୟ ଆନ୍ଦୋଳନକାରୀଙ୍କ ଦ୍ୱାରା ରେଳ ରୋକ କରାଯାଇ ଥିଲା। ଦଳିତ ସଂଗଠନ ସମ୍ବିଧାନ ବଞ୍ଚାଅ ସଂଘର୍ଷ ସମିତି ଦ୍ୱାରା ଭାରତ ବନ୍ଦ ଡାକରା ଦିଆଯାଇ ଥିଲେ ମଧ୍ୟ ପରବର୍ତ୍ତୀ ସମୟରେ ଏହାକୁ ଅନ୍ୟାନ୍ୟ କିଛି ସଂଗଠନ ସମର୍ଥନ କରିଥିଲେ । ଅନଗୁଳ ଜିଲାରେ ଜାତୀୟ ରାଜପଥ ଅବରୋଧ କରାଯାଇଛି । ଏସସିଏସଟି ସଙ୍ଘ ପକ୍ଷରୁ ଦିଆଯାଇଥିବା ସର୍ବଭାରତୀୟ ବନ୍ଦ ଡାକରା ରେ ଆଜି୫୫ନମ୍ବର ଜାତୀୟ ରାଜପଥର ରାସ୍ତାରୋକ କରାଯାଇଛି । ରାସ୍ତାର ଉଭୟ ପାର୍ଶ୍ଵରେ ଯାନବାହନ ଛିଡା ହୋଇ ରହିଛି । ପୁଲିସ ପହଂଚି ଆଇନ ଶୃଙ୍ଖଳା ପରିସ୍ଥିତି ଉପରେ ନଜର ରଖିଛି ।
ତେବେ ଏହାର ପ୍ରଭାବ ପଞ୍ଜାବରେ ସବୁଠାରୁ ଅଧିକ ଦୃଶ୍ୟମାନ ହୋଇଛି। ସୋସିଆଲ ମିଡିଆରେ ଅପପ୍ରଚାର ଆଶଙ୍କାରେ ପଞ୍ଜାବର କେତେକ ସ୍ଥାନରେ ଇଣ୍ଟରନେଟ ସେବାକୁ ବନ୍ଦ କରାଯାଇଛି। ଅପରପକ୍ଷରେ ଏହି ବନ୍ଦକୁ ରାଜନୈତିକ ଉଦ୍ଦେଶ୍ୟ ପ୍ରଣିତ ବୋଲି କେନ୍ଦ୍ର ମନ୍ତ୍ରୀ ରାମବିଲାସ ପାଶୱାନ୍ ଉଲ୍ଲେଖ କରିଛନ୍ତି । କେନ୍ଦ୍ର ସୁପ୍ରିମ କୋର୍ଟରେ ପୁର୍ନବିଚାର ଆବେଦନ କରିବାକୁ ଘୋଷଣା କରିଛନ୍ତି।
