ବେଲଗ୍ରେଡ : ଭାରତର ସୁମିତ ସାଙ୍ଗ୍ୱାନ ଓ ନିଖତ୍ ଜରିନ ଏଠାରେ ଚାଲିଥିବା ୫୬ତମ ବେଲଗ୍ରେଡ ଅନ୍ତର୍ଜାତୀୟ ବକ୍ସିଂ ଚମ୍ପିଆନସିପ୍ରେ ସ୍ୱର୍ଣ୍ଣପଦକ ହାସଲ କରିଛନ୍ତି। ରବିବାର ପୁରୁଷ ୯୧ କିଗ୍ରା ବର୍ଗ ଫାଇନାଲ ମୁକାବିଲାରେ ସୁମିତ ଇକ୍ୱେଡରର କାଷ୍ଟିଲୋ ଟରେସଙ୍କୁ ୫-୦ ପଏଣ୍ଟରେ ପରାସ୍ତ କରିଛନ୍ତି। ଏସୀୟ କ୍ରୀଡାର ରୌପ୍ୟପଦକ ବିଜେତା ସୁମିତ ଏହି ମୁକାବିଲାରେ ତାଙ୍କର ପ୍ରତିପକ୍ଷଙ୍କୁ ତିଷ୍ଠିବାର କୌଣସି ସୁଯୋଗ ଦେଇନଥିଲେ। ସୁମିତ ଏହି ସ୍ୱର୍ଣ୍ଣପଦକକୁ ତାଙ୍କ ପିତା ସୁରେନ୍ଦ୍ର ସାଙ୍ଗ୍ୱାନଙ୍କୁ ଉତ୍ସର୍ଗ କରିଛନ୍ତି। ଅପରପକ୍ଷରେ ମହିଳା ୫୧ କିଗ୍ରା ବର୍ଗ ଫାଇନାଲରେ ନିଖତ୍ ଗ୍ରୀସର କୌତ୍ସୋର୍ଗୋପୌଲୌ ଆଇକାତେରିନିଙ୍କୁ ୫-୦ ପଏଣ୍ଟରେ ପରାସ୍ତ କରି ଚମ୍ପିଆନ ଆଖ୍ୟା ଅର୍ଜନ କରିଛନ୍ତି। ପୂର୍ବତନ ବିଶ୍ୱ ଜୁନିୟର ଚମ୍ପିଆନ ନିଖତ୍ କାନ୍ଧରେ ଆଘାତ ପାଇବାପରେ ଦୀର୍ଘ ଦିନ ଧରି ବକ୍ସିଂ ରିଙ୍ଗ୍ରୁ ଦୂରେଇ ରହିଥିଲେ। ଏହି ଟୁର୍ଣ୍ଣାମେଣ୍ଟରେ ଅନ୍ୟ ଭାରତୀୟଙ୍କ ମଧ୍ୟରେ ହିମାଂଶୁ ଶର୍ମା (୪୯ କିଗ୍ରା) ସ୍ୱର୍ଣ୍ଣ, ଲାଲଡିନ୍ମାୱିଆ (୫୨ କିଗ୍ରା), ବରିନ୍ଦର ସିଂହ (୫୬ କିଗ୍ରା), ପବନ କୁମାର (୬୯ କିଗ୍ରା) ରୌପ୍ୟପଦକ ଜିତିଥିବାବେଳେ ରାଜେଶ ନରୱାଲ (୪୮ କିଗ୍ରା), ପ୍ରିୟଙ୍କା ଠାକୁର (୬୦ କିଗ୍ରା), ରୁମି ଗୋଗୋଇ (୭୫ କିଗ୍ରା) ଓ ନିର୍ମଳା ରାୱତ (୮୧ କିଗ୍ରା) ବ୍ରୋଞ୍ଜପଦକ ହାସଲ କରିଛନ୍ତି। ଭାରତ ଏହି ପ୍ରତିଯୋଗିତାରେ ମୋଟ ୩ଟି ସ୍ୱର୍ଣ୍ଣ, ୫ଟି ରୌପ୍ୟ ଓ ୫ଟି ବ୍ରୋଞ୍ଜପଦକ ଜିତିଛି।
Popular Categories
Previous article
Next article