ବାରିପଦା : ଶିମିଳିପାଳ ଓ ଏହାର ଚତୁଃର୍ଦ୍ଦିଗରେ ଥିବା ବନାଞ୍ଚଳରେ ଆଜିସୁଦ୍ଧା ୫୪ଟି ସ୍ଥାନରେ ନିଆଁ ଲାଗିଛି। ଏ ନେଇ ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପ କ୍ଷେତ୍ର ନିର୍ଦ୍ଦେଶକ ତଥା ଆଞ୍ଚଳିକ ମୁଖ୍ୟ ସଂରକ୍ଷକଙ୍କ ପକ୍ଷରୁ ସୂଚନା ଦିଆଯାଇଛି। ଚିହ୍ନଟ ୫୪ଟି ବନାଗ୍ନିସ୍ଥଳୀ ମଧ୍ୟରୁ ଶିମିଳିପାଳ ଦକ୍ଷିଣ ବନ୍ୟପ୍ରାଣୀ ଖଣ୍ଡର ୧୯ଟି ଓ ଶିମିଳିପାଳ ଉତ୍ତର ବନ୍ୟପ୍ରାଣୀ ଖଣ୍ଡର ୯ଟି ସ୍ଥାନକୁ ମିଶାଇ ଶିମିଳିପାଳର ଆଭ୍ୟନ୍ତରୀଣ ଅଞ୍ଚଳରେ ମୋଟ ୨୮ଟି ସ୍ଥାନରେ ନିଆଁ ଲାଗିଥିବା ବେଳେ ଅନ୍ୟ ବନଖଣ୍ଡ ମଧ୍ୟରୁ ବାରିପଦାର ୮, ରାଇରଙ୍ଗପୁରର ୧୦ ଓ କେନ୍ଦୁଝର ବନ୍ୟପ୍ରାଣୀ ଖଣ୍ଡର ୮ଟି ସ୍ଥାନରେ ନିଆଁ ଲାଗିଛି। ଶିମିଳିପାଳର ୨୮ଟି ବନାଗ୍ନି ସ୍ଥଳ ମଧ୍ୟରୁ କେବଳ ୧୧ଟି ସ୍ଥାନରେ ଏହାକୁ ଲିଭାଇବା ଦିଗରେ ବନ ବିଭାଗ ଏବଂ ଓଡ୍ରାଫ ଦଳ ସଫଳ ହୋଇଥିବା କୁହାଯାଉଥିଲେ ମଧ୍ୟ ଏହି ଦଳ ନାକେଦମ୍ ହେବା ସହିତ ଶିମିଳିପାଳ କର୍ତ୍ତୃପକ୍ଷଙ୍କ ଚିନ୍ତାର କାରଣ ବଢାଇଛି। ନିଆଁ ଲିଭା ସତେଯେମିତି ପ୍ରଚାର ସର୍ବସ୍ବ ପାଲଟିଥିବା ପରିବେଶବିତ୍ ଅଭିଯୋଗ କରିଛନ୍ତି। ଶିମିଳିପାଳ ପାଦଦେଶରେ ଥିବା ଗ୍ରାମ ସଂଲଗ୍ନ ବନାଞ୍ଚଳରେ ହୁହୁ ଜଳୁଥିବା ନିଆଁ ଯେଭଳି ଗ୍ରାମ ଭିତରକୁ ନ ବ୍ୟାପିବ ସେଥିନେଇ ଗ୍ରାମବାସୀ ମଧ୍ୟ ସ୍ୱତଃ ପ୍ରବୃତ୍ତ ଭାବେ ଜଗି ରହିବା ସହିତ ଶୁଖିଲା ପତ୍ରକୁ ଉଠାଇ ପରିଷ୍କାର କରିବାରେ ଲାଗି ପଡିଛନ୍ତି। ତଥାପି ଶାମାଖୁଣ୍ଟା ବ୍ଲକର କିଛି ଭାଗରେ ଲାଗିଥିବା ନିଆଁ କରାଳ ରୂପ ଧାରଣ କରି କାକରପାଣି ଗାଁ ସଂଲଗ୍ନ ଗ୍ରାମକୁ ବ୍ୟାପିଛି। ସ୍ଥାନୀୟ ଗ୍ରାମବାସୀଙ୍କ ପକ୍ଷରୁ ପ୍ରଚେଷ୍ଟା ଜାରି ସତ୍ତ୍ବେ ନିଆଁକୁ କରାୟତ୍ତ କରିପାରୁ ନଥିବା ସହିତ ବନବିଭାଗ ପକ୍ଷରୁ ଅଣାଯାଇଥିବା ନିଆଁଲିଭା ମେସିନ୍ରେ ତେଲ ସରିଯିବାରୁ ତାହା ଫେରିଯାଇଥିବା ଗ୍ରାମବାସୀ କ୍ଷୋଭର ସହ କହିଛନ୍ତି। ଏଭଳି ଘଟଣା ବନ ବିଭାଗର ନିଆଁ ଲିଭାଇବା ପ୍ରତି ରହିଥିବା ତତ୍ପରତା ଓ ଆନ୍ତରିକତା ଉପରେ ପ୍ରଶ୍ନବାଚୀ ସୃଷ୍ଟି କରିଛି।
Popular Categories
Previous article
Next article