ଜାପାନରେ ଚାଲିଥିବା ଟୋକିଓ ପାରାଲିମ୍ପିକ୍ସ ପୁରୁଷ ଏକକ (ଏସଏଲ୩) ବ୍ୟାଡମିଣ୍ଟନ ଇଭେଣ୍ଟରେ ଭାରତର ମନୋଜ ସରକାର ଶନିବାର କାଂସ୍ୟ (ବ୍ରୋଞ୍ଜ) ପଦକ ଜିତିଛନ୍ତି । ବ୍ୟାଡମିଣ୍ଟନ ପୁରୁଷ ଏକକରେ ପ୍ରମୋଦ ଭଗତ ସ୍ବର୍ଣ୍ଣ ପଦକ ଜିତଥିବା ବେଳେ ମନୋଜ ସେହି ଇଭେଣ୍ଟରେ ଆଉ ଏକ ପଦକ ଜିତିଛନ୍ତି। ଫଳରେ ଗୋଟିଏ ଦିନରେ ଭାରତ ପୁଣି ୪ଟି ପଦକ ହାସଲ କରିଛି । ଭାରତୀୟ ସଟଲର ମନୋଜ ଜାପାନର ଡାଏସୁକେ ଫୁଜିହାରାଙ୍କୁ ୨୨-୨୦, ୨୧-୧୩ରେ ପରାସ୍ତ କରିଛନ୍ତି ।
ମନୋଜଙ୍କୁ ପ୍ରଥମ ଗେମରେ ଜାପାନର ପ୍ରତିପକ୍ଷଙ୍କ ବିରୋଧରେ କଡ଼ା ସଂଘର୍ଷ କରିବାକୁ ପଡିଥିଲା | ମନୋଜ ୧୮-୧୪ରେ ଅଗ୍ରଣୀ ହେବା ସତ୍ତ୍ବେ ଫୁଜିହାରାର ପ୍ରତ୍ୟାବର୍ତ୍ତନ କରି ସମସ୍ତଙ୍କୁ ଆଶ୍ଚର୍ଯ୍ୟ କରି ଦେଇଥିଲେ । ହେଲେ ମନୋଜ ମାନସିକ ସନ୍ତୁଳନ ବଜାୟ ରଖି ଏବଂ ଶେଷରେ ୨୨-୨୦ରେ ପଥମ ଗେମ୍ ଜିତି ନେଇଥିଲେ। ପରେ ୧୯ ମିନିଟରେ, ସେ ୨୧-୧୩ରେ ଦ୍ୱିତୀୟ ଗେମ୍ ଜିତି ବ୍ୟାଡମିଣ୍ଟନରେ ଦେଶ ପାଇଁ ଆଉ ଏକ ପଦକ ହାସଲ କରିଥିଲେ।
ଏଥି ସହ ଟୋକିଓ ପାରା ଅଲିମ୍ପିକ୍ସରେ ଭାରତର ପଦକ ସଂଖ୍ୟା ୧୭କୁ ବୃଦ୍ଧି ପାଇଛି। ଏଥି ସହ ଭାରତ ୪ଟି ସ୍ବର୍ଣ୍ଣ, ୭ଟି ରୌପ୍ୟ ଓ ୬ଟି କାଂସ୍ୟ (ବ୍ରେଞ୍ଜ) ପଦକ ସହିତ ମୋଟ ୧୭ଟି ପଦକ ଜିତି ପଦକ ତାଲିକାର ୨୬ ତମ ସ୍ଥାନରେ ରହିଛି।
