ଡେସ୍କ: ରାଷ୍ଟ୍ରବାଦୀ କଂଗ୍ରେସ ପାର୍ଟି – ଏନସିପିର ମୁଖ୍ୟ ଶରଦ ପାୱାର ଇସ୍ତଫା ପତ୍ର ପ୍ରତ୍ୟାହାର କରିନେଇଛନ୍ତି। ଆଜି ଗଣମାଧ୍ୟମକୁ ଶ୍ରୀ ପାୱାର କହିଛନ୍ତି ଯେ ସେ ଦଳୀୟ କର୍ମୀଙ୍କ ନିଷ୍ପତ୍ତି ବିରୁଦ୍ଧରେ ଯିବେ ନାହିଁ। ଆଜି ସକାଳେ ଦଳର କୋର କମିଟି ଦଳୀୟ ମୁଖ୍ୟ ପଦରୁ ଇସ୍ତଫା ଦେବା ନେଇ ଶରଦ ପାୱାରଙ୍କ ଇସ୍ତଫା ପତ୍ରକୁ ଅଗ୍ରାହ୍ୟ କରିବା ସହ ଦଳୀୟ ମୁଖ୍ୟ ଭାବେ କାର୍ଯ୍ୟ କରିବାକୁ ଅନୁରୋଧ କରିଥିଲା। ଶ୍ରୀ ପାୱାରଙ୍କ ଇସ୍ତଫା ଘୋଷଣା ପରେ ଆଜି ସକାଳେ ଦଳର ନୂଆ ଅଧ୍ୟକ୍ଷ ଚୟନ ଲାଗି କୋର କମିଟି ବୈଠକ ବସିଥିଲା।
ମୁମ୍ବାଇରେ ଅନୁଷ୍ଠିତ ବୈଠକରେ ଏନସିପିର ୧୮ ଜଣିଆ କୋର କମିଟି ସଦସ୍ୟଙ୍କ ମଧ୍ୟରୁ ଅଜିତ ପାୱାର ଓ ସୁପ୍ରିୟା ଶୋଲେଙ୍କ ସମେତ ପ୍ରଫୁଲ ପଟେଲ, ଜୟନ୍ତୀ ପାଟିଲ, ଛଗନ ଭୁଜବଳ ପ୍ରମୁଖ ଉପସ୍ଥିତ ଥିଲେ। ଅଜିତ ପାୱାର କହିଥିଲେ ଯେ ଦଳର ନୂଆ ମୁଖିଆ ଶରଦ ପାୱାରଙ୍କ ଅଧୀନରେ କାର୍ଯ୍ୟ କରିବେ। ତେବେ ଶରଦ ପାୱାରଙ୍କ ଇସ୍ତଫା ପ୍ରଦାନ ଘୋଷଣା ପରେ ଦଳୀୟ କର୍ମୀ ଓ ଦଳର ତୁଙ୍ଗ ନେତା ଇସ୍ତଫା ପତ୍ର ପ୍ରତ୍ୟାହାର ଲାଗି ଅନୁରୋଧ କରିଆସୁଥିଲେ।
