ମୁମ୍ବଇ – ଶାହରୁଖଙ୍କର ତିନି ଜଣ ବଡ ପ୍ରଶଂସକ । ତାଙ୍କୁ ଦେଖିବା ପାଇଁ ଉତ୍ତରପ୍ରଦେଶ ଏବଂ ହରିୟାନାରୁ ଆସିଥିଲେ । ଟ୍ରେନ୍ରେ ସେମାନେ ମୁମ୍ବଇରେ ପହଞ୍ଚିଥିଲେ । ଶାହାରୁଖଙ୍କ ଘର ମନ୍ନତ ଆଗରେ ସେଲଫି ନେଇଥିଲେ । ପରେ ସଲମାନ୍ ଖାନ୍ଙ୍କ ଘର ନିକଟକୁ ଯାଇଥିଲେ । କିଛି ସମୟ ପାଲ୍ ହିଲସ୍ରେ ସମୟ ବିତାଇଥିଲେ । ସେତେବେଳକୁ ସେମାନଙ୍କର ଟଙ୍କା ସରିଯାଇଥିଲା । ଘରକୁ ଯିବା ପାଇଁ କୌଣସି ସାଧନ ନଥିଲେ । ଏହି ସମୟରେ ସେମାନଙ୍କ ମନରେ ଏକ ସୈତାନ ବୁଦ୍ଧି ପଶିଥିଲା । କାହାର ଗାଡି ଚୋରି କରି ସେମାନେ ନିଜ ରାଜ୍ୟକୁ ଫେରିବା ପାଇଁ ମନସ୍ଥ କରିଥିଲେ ।
ବାନ୍ଦ୍ରାରେ ନଦୀମ ନାମକ ବ୍ୟକ୍ତି ତାଙ୍କ ମିନି ଟ୍ରକକୁ ଏକ ରେଷ୍ଟୁରାଣ୍ଟ ବାହାରେ ରଖି ଖାଇବା ପାଇଁ ଯାଇଥିଲେ, ଗାଡିରେ ତାଙ୍କର ଚାବି ଲାଗିଥିଲା । ଶାହାରୁଖଙ୍କ ପ୍ରଂଶସକ ରାଜୁ, ପଓ୍ୱନ ଏବଂ ସନ୍ତୋଷ ଏହି ଗାଡିଟିକୁ ଚୋରିକରି ନେଇଥିଲେ । ପରେ ନଦୀମ ଖାଇସାରି ଆସି ଗାଡିକୁ ପାଇ ନଥିଲେ । ସେ ତୁରନ୍ତ ଥାନାରେ ଏ ନେଇ ଅଭିଯୋଗ କରିଥିଲେ । ତିନି ଜଣ ତାଙ୍କ ଗାଡିକୁ ଚୋରି କରି ନେଉଥିବା ପୁଲିସ ସିସିଟିଭି ଫୁଟେଜ୍ରୁ ଦେଖିବା ପାଇଁ ପାଇଥିଲା ।
ପରେ ଦୁଇଟି ଟୋଲ୍ ପ୍ଲାଜାରେ ଗାଡିର ହାସ୍ଟ୍ୟାଗ କଟିଥିବା ନଦୀମଙ୍କ ପାଖକୁ ମେସେଜ୍ ଆସିଥିଲା । ସେ ତୁରନ୍ତ ପୁଲିସକୁ ଏ ବିଷୟରେ ସୂଚନା ଦେଇଥିଲେ । ପୁଲିସ ନଭସାରି ପୁଲିସ ସହ ଯୋଗା ଯୋଗ କରି ଚୋରା ମିନିଟ୍ରକକୁ ଠାବ କରିଥିଲା । ପରେ ଏହି ତିନିଜଣଙ୍କ ପୁଲିସ ଗିରଫ କରିଛି । ସେମାନେ ଟଙ୍କା ସରିଯିବାରୁ ଘରକୁ ଫେରିବା ପାଇଁ ଗାଡିଟି ଚୋରି କରିଥିବା କଥା ପୁଲିସ ଆଗରେ ସ୍ୱୀକାର କରିଛନ୍ତି । ପୁଲିସ ଧାରା ୩୭୯ ଏବଂ ୩୪ରେ ଏମାନଙ୍କୁ ଗିରଫ କରି କୋର୍ଟ ଚାଲାଣ କରିଛି ।
Comments are closed.