ବ୍ରହ୍ମପୁର: କେରଳର ୱାୟନାଡରେ ଭୁସ୍ଖଳନ ଯୋଗୁ ନିଖୋଜ ହୋଇଯାଇଥିବା ଅନେକ ବ୍ୟକ୍ତିଙ୍କ ଏପର୍ଯ୍ୟନ୍ତ ମଧ୍ୟ ସନ୍ଧାନ ମିଳିପାରିନି । ସେହି ଅଞ୍ଚଳର ମାଟିତଳେ ଓ କାଦୁଅରେ ଅନେକ ଲୋକ ପୋତି ହୋଇ ରହିଥିବା ସନ୍ଦେହ କରାଯାଉଛି। ଏପରିକି ମାଟିତଳୁ ନିଖୋଜ ବ୍ୟକ୍ତିଙ୍କୁ ଖୋଜିବାକୁ ସେଠାରେ ଅତ୍ୟାଧୁନିକ ଡ୍ରୋନ ତଥା ଯନ୍ତ୍ରାଂଶ ବ୍ୟବହାର କରାଯାଇଛି। ତେବେ ନିଖୋଜ ବ୍ୟକ୍ତିଙ୍କୁ ଖୋଜିବାକୁ ଚାଲିଥିବା ଉଦ୍ଧାର କାର୍ଯ୍ୟରେ ସାମିଲ ହେବାକୁ ଯାଇଛି ବ୍ରହ୍ମପୁର ପୁଲିସର ସନ୍ଧାନୀ କୁକୁର ‘ଷ୍ଟ୍ରମ’। ରବିବାର ବ୍ରହ୍ମପୁର ପୁଲିସ ଜିଲାର ୫ ଜଣ କର୍ମଚାରୀ ଏହି ସନ୍ଧାନୀ କୁକୁରକୁ ସାଙ୍ଗରେ ଧରି ବିବେକାନନ୍ଦ ଏକ୍ସପ୍ରେସ ଟ୍ରେନରେ କେରଳ ଅଭିମୁଖେ ଯାତ୍ରା କରିଛନ୍ତି। ବ୍ରହ୍ମପୁର ଆମ୍ବପୁଆ ସ୍ଥିତ ରିଜର୍ଭ ପୁଲିସ କାର୍ଯ୍ୟାଳୟ ଠାରେ ରହୁଥିବା ଏହି କୁକୁର ପୁଲିସର ବିଭିନ୍ନ ସନ୍ଧାନୀ କାର୍ଯ୍ୟରେ ଉତ୍ତମ ତଥା ଉଲ୍ଲେଖନୀୟ ପ୍ରଦର୍ଶନ କରିସାରିଛି । କେରଳ ୱାୟନାଡର ଭୁସ୍ଖଳନ ସ୍ଥଳରେ ଏହି କୁକୁର ପାଣି ଭିତରେ ଓ ମାଟି ତଳେ ପୋତି ହୋଇ ରହିଥିବା ଲୋକଙ୍କୁ ଖୋଜି ବାହାର କରିବାରେ ସହଯୋଗ କରିବ ବୋଲି କୁହାଯାଉଛି।
Popular Categories
Previous article
Next article