ଗଣଶିକ୍ଷା ମନ୍ତ୍ରୀଙ୍କୁ ଭେଟିଲେ ବିଭିନ୍ନ ଶିକ୍ଷକ ସଂଘର ପ୍ରତିନିଧି, ସୌହାର୍ଦ୍ଦ୍ୟପୂର୍ଣ୍ଣ ଆଲୋଚନା ସହ ଦାବିପତ୍ର ଉପସ୍ଥାପନ

ଭୁବନେଶ୍ୱର : ଆଜି ପୂର୍ବାହ୍ନରେ ରାଜ୍ୟ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶଙ୍କ ଲୋକସେବା ଭବନସ୍ଥ କାର୍ଯ୍ୟାଳୟ ପ୍ରକୋଷ୍ଠରେ ଓଷ୍ଟା, ନିଖିଳ ଉତ୍କଳ ପ୍ରାଥମିକ ସ୍କୁଲ ଶିକ୍ଷକ ଫେଡେରେସନ୍‌, ଉତ୍କଳ ସଂସ୍କୃତ ମହାସଂଘ ଏବଂ ନିଖିଳ ସଂସ୍କୃତ ମହାମଣ୍ଡଳମ୍‌, ନିଖିଳ ଓଡ଼ିଶା ଚୁକ୍ତିଭିତ୍ତିକ ଶିକ୍ଷକ ସଂଘ ତଥା ଓଡ଼ିଶା ସରକାରୀ ହାଇସ୍କୁଲ ନୂତନ ପେନ୍‌ସନ୍‌ ଯୋଜନା ଶିକ୍ଷକ ସଂଘ, ମିଳିତ ଶିକ୍ଷକ ଓ କ ର୍ମଚାରୀ ସଂଘ, ନିଖିଳ ଓଡ଼ିଶା ଊର୍ଦ୍ଦୁ ପର୍ସୀୟାନ୍‌ ଶିକ୍ଷକ ସଂଘ ଏବଂ ଓଡ଼ିଶା ଅଭିଭାବକ ମହାସଂଘର କର୍ମକର୍ତ୍ତା ପ୍ରମୁଖ ଉପସ୍ଥିତ ରହି ମନ୍ତ୍ରୀ ଶ୍ରୀ ଦାଶଙ୍କୁ ନିଜ ନିଜ ଅନୁଷ୍ଠାନ ସଂପର୍କରେ ଅବଗତ କରାଇଥିଲେ । ସଂଘଗୁଡ଼ିକର ପ୍ରତିନିଧିମାନେ ମନ୍ତ୍ରୀ ଶ୍ରୀ ଦାଶଙ୍କ ସହ ଏକ ସୌହାର୍ଦ୍ଦ୍ୟପୂର୍ଣ୍ଣ ଆଲୋଚନା ପରେ ସେମାନଙ୍କର ଦାବିପତ୍ର ଉପସ୍ଥାପନ କରିଥିଲେ ।

ଏହି ଆଲୋଚନା ସମୟରେ ବିଦ୍ୟାଳୟ ଓ ଗଣଶିକ୍ଷା ବିଭାଗର କମିଶନର ତଥା ଶାସନ ସଚିବ ଅଶ୍ୱଥୀ ଏସ୍‌, ରାଜ୍ୟ ପ୍ରକଳ୍ପ ନିର୍ଦ୍ଦେଶକ (ଓସେପା) ଅନୁପମ ସାହା, ବିଭାଗୀୟ ସ୍ୱତନ୍ତ୍ର ସଚିବ ଶୁଭଶ୍ରୀ ନନ୍ଦ, ମାଧ୍ୟମିକ ଶିକ୍ଷା ନିର୍ଦ୍ଦେଶକ ସଂଗ୍ରାମ କେଶରୀ ମହାପାତ୍ର, ଉଚ୍ଚ ମାଧ୍ୟମିକ ଶିକ୍ଷାର ପରିଷଦର ଅଧ୍ୟକ୍ଷ ଅଶ୍ୱିନୀ କୁମାର ମିଶ୍ର, ପ୍ରାଥମିକ ଶିକ୍ଷା ନିର୍ଦ୍ଦେଶକ ବୃନ୍ଦାବନ ଶତପଥୀ, ଅତିରିକ୍ତ ସଚିବ ଧରମ ହାଂସଦା, ସମ୍ବିତ କୁମାର ନାୟକ, ବିଭାଗୀୟ ବରିଷ୍ଠ ଅଧିକାରୀ ଖଗେନ୍ଦ୍ର କୁମାର ପାଢ଼ୀ, ଅନୁଶାସନ ସଚିବ ବିଚିତ୍ରାନନ୍ଦ ପଟ୍ଟନାୟକ ପ୍ରମୁଖ ଉପସ୍ଥିତ ଥିଲେ।