ନୂଆଦିଲ୍ଲୀ : ଅନୁସୂଚିତ ଜାତି ଏବଂ ଜନଜାତି (ଏସ୍ସି/ଏସ୍ଟି) ଅତ୍ୟାଚାର ନିରୋଧ ଆଇନ ସଂଶୋଧନ ନେଇ ସୁପ୍ରିମକୋର୍ଟଙ୍କ ରାୟ ବିରୋଧରେ ସୋମବାର ଦଳିତ ସଂଗଠନଗୁଡ଼ିକ ଦେଶ ବ୍ୟାପୀ ବନ୍ଦ ପାଳନ କରିଥିଲେ । ବନ୍ଦ ପାଳନ ଆଳରେ ବିଭିନ୍ନ ସ୍ଥାନରେ ହିଂସାକାଣ୍ଡ ଭିଆଯାଇଥିଲା । ବିଭିନ୍ନ ସ୍ଥାନରେ ପୋଡ଼ାଜଳା, ଭଙ୍ଗାରୁଜା କରାଯାଇଥିଲା । ବସ୍ ଓ ରେଳ ସେବା ଠପ୍ ହୋଇଯାଇଥିଲା । ହିଂସାକାଣ୍ଡରେ ୯ ଲୋକ ପ୍ରାଣ ହରାଇଥିଲେ ।
ବିଶେଷ କରି ୧୫ ରାଜ୍ୟରେ ବନ୍ଦର ପ୍ରଭାବ ଦେଖିବାକୁ ମିଳିଥିଲା । ସେଥିମଧ୍ୟରୁ ୧୦ଟି ହିନ୍ଦୀ ଭାଷି ରାଜ୍ୟରେ ବନ୍ଦର ବ୍ୟାପକ ପ୍ରଭାବ ଅନୁଭୂତ ହୋଇଥିଲା । ଏହି ୧୦ ରାଜ୍ୟର ଅନୁଧ୍ୟାନରୁ ଜାଣିବାକୁ ମିଳିଛି ଯେ ଏଠାରେ ସର୍ବାଧିକ ଲୋକସଭା ଆସନରେ ଦଳିତ ଭୋଟର ନିର୍ଣ୍ଣାୟକ ଭୂମିକା ନିର୍ବାହ କରନ୍ତି । ୨୦୧୧ ଜନଗଣନା ଅନୁସାରେ ଦେଶରେ ଦଳିତଙ୍କ ଜନସଂଖ୍ୟା ୨୪% ରହିଛି । ଅର୍ଥାତ ୨୫ କୋଟି ଲୋକ ଦଳିତ ବର୍ଗର । ୧୨୪୧ ସମୂହଙ୍କୁ ଦଳିତ ବର୍ଗର ମାନ୍ୟତା ଦିଆଯାଇଛି । ଦେଶର ୫୪୩ ଲୋକସଭା ଆସନ ମଧ୍ୟରୁ ୮୦ ଆସନ ଦଳିତଙ୍କ ପାଇଁ ସଂରକ୍ଷିତ ରହିଛି। ଏହାବାଦ ୧୫୦ରୁ ଅଧିକ ଆସନରେ ଦଳିତ ଭୋଟଙ୍କ ପ୍ରଭୁତ୍ୱ ରହିଛି । ଦେଶର ୧୩୧ ସାଂସଦ ଦଳିତ ବର୍ଗର ।
ଦେଶର ସର୍ବାଧିକ ଦଳିତ ବର୍ଗର ଲୋକ ପଞ୍ଜାବରେ ଅଛନ୍ତି । ପଞ୍ଜାବ ଜନସଂଖ୍ୟାର ୩୧.୯% ଲୋକ ଦଳିତବର୍ଗର । ପଞ୍ଜାବର ୩୪ ଲୋକସଭା ଆସନ ଦଳିତଙ୍କ ପାଇଁ ସଂରକ୍ଷିତ ଅଛି । ଉତ୍ତର ପ୍ରଦେଶର ୨୦.୧୭% ଲୋକ ଦଳିତ ବର୍ଗର ହୋଇଥିବାବେଳେ ୧୪ଟି ଆସନ ଦଳିତଙ୍କ ପାଇଁ ସଂରକ୍ଷିତ ଅଛି । ସେହିପରି ହିମାଚଳ ପ୍ରଦେଶର ୨୫.୨% ଲୋକ ଓ ହରିୟାଣାର ୨୦.୨% ଲୋକ ଦଳିତ ବର୍ଗର । ପଶ୍ଚମବଙ୍ଗ, ବିହାର, ତାମିଲନାଡୁ, ଆନ୍ଧ୍ରପ୍ରଦେଶ, ମହାରାଷ୍ଟ୍ର, କର୍ଣ୍ଣାଟକ ଏବଂ ରାଜସ୍ଥାନରେ ୬ରୁ ୧୦% ପର୍ଯ୍ୟନ୍ତ ଲୋକ ଦଳିତ ବର୍ଗର ।
ଏନ୍ସିଆରବି ତଥ୍ୟ ଅନୁସାରେ ୨୦୧୪ରୁ ୨୦୧୬ ମଧ୍ୟରେ ଦଳିତଙ୍କ ଉପରେ ୧% ଅତ୍ୟାଚାର ବଢିଛି । ଦଳିତଙ୍କ ବିରୋଧରେ ମଧ୍ୟପ୍ରଦେଶର ୪୯%, ଉତ୍ତର ପ୍ରଦେଶରେ ୨୦%, ଗୁଜରାଟରେ ୨୧%, କେରଳରେ ୧୪% ଅପରାଧ ବଢିଛି । ସେପଟେ ଦଳିତଙ୍କ ବିରୋଧରେ ଝାରଖଣ୍ଡରେ ୪୨%, ଛତିଶଗଡ଼ରେ ୩୨%, ବିହାରରେ ୨୮% ରାଜସ୍ଥାନରେ ୨୫% ଏବଂ ତାମିଲନାଡୁରେ ୧୫% ଅପରାଧ କମିଛି । ୨୦୧୬ରେ ଏସ୍ସି/ଏସ୍ଟି ଆଇନରେ ୪୦,୭୭୪ ମାମଲା ଦାଏର ହୋଇଛି । ଏଥିରୁ ୭୮.୩% ମାମଲାରେ ଅଭିଯୋଗଫର୍ଦ ଦାଖଲ ହୋଇଥିବାବେଳେ ମାତ୍ର ୨୫.୮% ମାମଲାର ଅଭିଯୁକ୍ତ ଦୋଷୀ ଘୋଷିତ ହୋଇଛନ୍ତି ।
