ବଡ଼ମ୍ବା – ପୂଣ୍ୟାତ୍ମା ଉତ୍କଳମଣି ପଣ୍ଡିତ ଗୋପବନ୍ଧୁ ଦାସଙ୍କ ୯୪ତମ ଶ୍ରାଦ୍ଧବାର୍ଷିକୀ ପାଳନ ଅବସରରେ ଦୈନିକ ‘ସମାଜ’ ଆନୁକୂଲ୍ୟରେ ସପ୍ତାହବ୍ୟାପି ସେବା ଓ ସେବକ କାର୍ଯ୍ୟକ୍ରମ ରାଜ୍ୟବ୍ୟାପି ପାଳନ କରାଯାଇଛି । ମଙ୍ଗଳବାର ଏହି କାର୍ଯ୍ୟକ୍ରମର ଅନ୍ତିମ ଦିବସ ଅର୍ଥାତ ସମାପନରେ ବଡ଼ମ୍ବା ସଦର ମହକୁମାରେ ଚାରା ରୋପଣ ଓ ଏ ସଂକ୍ରାନ୍ତ ଜନସଚେତନ କାର୍ଯ୍ୟକ୍ରମ କରାଯାଇଥିଲା । ସ୍ଥାନୀୟ ତେଲିସାହି ଯୁବ ସମାଜ ଏବଂ ଶ୍ରୀ ରଘୁନାଥ ଜୀୟୁ ମନ୍ଦିର ପରିଚାଳନା କମିଟି ସହଯୋଗରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ନିଜିଗଡ଼ ବଡ଼ମ୍ବା ସରପଞ୍ଚ ମଧୁସ୍ମିତା ମହାନ୍ତି ମୁଖ୍ୟଅତିଥି ଭାବେ ଯୋଗଦେଇଥିଲେ ।
ଶ୍ରୀମତୀ ମହାନ୍ତି ଏହି ଅବସରରେ ଜୀବ,ଜୀବନ ଓ ପ୍ରକୃତିର ବନ୍ଧୁ ଗଛ ଅଟେ ଏବଂ ଆସ ଆମେ ଗଛ ଲଗାଇବା ଲାଗି ଯୁବ ସମାଜକୁ ଆହ୍ୱାନ କରିଥିଲେ । କାର୍ଯ୍ୟକ୍ରମ ଅବସରରେ ରଘୁନାଥ ଜୀୟୁ ମଠରେ ବନବିଭାଗ ସହଯୋଗରୁ ମିଳିଥିବା ବିଭିନ୍ନ ଉପାଦେୟ ଗଛର ଚାରା ସରପଞ୍ଚ ତଥା ନିମନ୍ତ୍ରିତ ଅତିଥି ଲଗାଇଥିଲେ । ସମାଜ ବ୍ଲକ ପ୍ରତିନିଧି ଅମରେଶ ରଥଙ୍କ ଆବାହକତ୍ୱରେ ଅନୁଷ୍ଠିତ ଏହି ସାମାଜିକ ଉତ୍ସବରେ ପୂର୍ବତନ ବ୍ଲକ ଉପାଧ୍ୟକ୍ଷ ବୃନ୍ଦାବନ ପରିଡ଼ା,ସମାଜସେବୀ ଚିନ୍ମୟକୁମାର ପଟ୍ଟନାୟକ,ତେଲିସାହି ୱାର୍ଡ଼ସଭ୍ୟ ଜ୍ଞାନରଞ୍ଜନ ଦାଶ,ସାହି ମୁରବୀ ସନ୍ତୋଷକୁମାର ପରିଡ଼ା,ନୀଳମଣି ସେଠୀ,ସାମ୍ବାଦିକ ଗିରିଜାପ୍ରସାଦ ମିଶ୍ର ପ୍ରମୁଖ ନିମନ୍ତ୍ରିତ ଅତିଥି ଭାବେ ଯୋଗଦେଇଥିଲେ । ବଡ଼ମ୍ବା ତେଲିସାହି ଯୁବ ସମାଜର ଆବାହକ ନରେଶ ବେହେରା,ବାପି ବେହେରା ପ୍ରମୁଖ ସଦସ୍ୟ କାର୍ଯ୍ୟକ୍ରମ ସଂଯୋଜନାରେ ସହଯୋଗ କରିଥିଲେ । ସରପଞ୍ଚ ଶ୍ରୀମତୀ ମହାନ୍ତି ଏହି ଅବସରରେ ବଡ଼ମ୍ବା ସହରର ବିଭିନ୍ନ ମଠ ମନ୍ଦିର ସମେତ ପ୍ରମୁଖ ସ୍ଥାନରେ ଆଗାମୀ ଦିନରେ ବ୍ୟାପକ ଚାରା ରୋପଣ କରିବାକୁ ଉପସ୍ଥିତ ଯୁବ ସମାଜ ସଦସ୍ୟଙ୍କୁ ସଂକଳ୍ପ କରାଇଥିଲେ ।
