ବେଙ୍ଗାଲୁରୁ : ଚଳିତବର୍ଷର ରଣଜୀ ଟ୍ରଫି କ୍ରିକେଟ ଫାଇନାଲରେ ପ୍ରବେଶ କରିଛି ସୌରାଷ୍ଟ୍ର। ସୋମବାର ସମାପ୍ତ ହୋଇଥିବା ସେମିଫାଇନାଲରେ ପୂର୍ବ ଚମ୍ପିଆନ୍ କର୍ଣ୍ଣାଟକକୁ ସୌରାଷ୍ଟ୍ର ୫ ୱିକେଟରେ ପରାସ୍ତ କରିଛି। ଭାରତୀୟ ଟେଷ୍ଟ ଖେଳାଳି ଚେତେଶ୍ବର ପୂଜାରା ଓ ସେଲ୍ଡନ ଜ୍ୟାକ୍ସନ୍ ଶତକ ହାସଲ କରିବା ସହ ସୌରାଷ୍ଟ୍ରକୁ ଏହି ସ୍ମରଣୀୟ ବିଜୟ ଦେଇଥିଲେ। ଫେବୃୟାରୀ ୨ରୁ ନାଗପୁରରେ ବିଭର୍ଦ-ସୌରାଷ୍ଟ୍ର ରଣଜୀ ଟ୍ରଫି ଫାଇନାଲ ମ୍ୟାଚ୍ ଖେଳାଯିବ।
୪ର୍ଥ ଦିନ ଶେଷରେ ରଣଜୀ ଟ୍ରଫି ଫାଇନାଲ ଖେଳିବାଠାରୁ ଆଉ ମାତ୍ର ୫୫ ରନ୍ ଦୂରରେ ରହିଥିଲା ସୌରାଷ୍ଟ୍ର। ୨ୟ ଇନିଂସରେ ୨୭୯ ରନ୍ ବିଜୟଲକ୍ଷ୍ୟର ପିଛା କରିଥିବା ସୌରାଷ୍ଟ୍ର ସୋମବାର ମ୍ୟାଚ୍ର ୫ମ ତଥା ଅନ୍ତିମଦିନରେ ୫ ୱିକେଟ ହରାଇ ବିଜୟୀ ହୋଇଥିଲା। ସୌରାଷ୍ଟ୍ର ରବିବାର ୪ର୍ଥ ଦିନ ଶେଷରେ ୩ ୱିକେଟ ହରାଇ ୨୨୪ ରନ୍ କରିଥିଲା। ୨ୟ ଇନିଂସ ଆରମ୍ଭରୁ ସୌରାଷ୍ଟ୍ର ବିପର୍ଯ୍ୟୟ ଭୋଗି ମାତ୍ର ୨୩ ରନ୍ରେ ୩ଟି ୱିକେଟ ହରାଇଥିଲା। ତେେବ ଚେତେଶ୍ବର ପୂଜାରା ଓ ସେଲ୍ଡନ ଜ୍ୟାକ୍ସନ୍ ଶତକ ହାସଲ କରିବା ସହ ୪ର୍ଥ ୱିକେଟ ପାଇଁ ୨୧୪ ରନ୍ ଯୋଗକରି ଦଳକୁ ଜିତାଇଥିଲେ। ୧୬ଶ ପ୍ରଥମଶ୍ରେଣୀ ଶତକ ହାସଲ କରିଥିବା ଜ୍ୟାକ୍ସନ ୨୧୭ ବଲ୍ରୁ ୧୫ଟି ଚୌକା ସହ ୧୦୦ ରନ୍କରି ଆଉଟ ହୋଇଥିଲେ। ପରେ ଅର୍ପିତ ବାସୱାଡ଼ା ୧୨ ରନ୍କରି ବିଦାୟ ନେଇଥିଲେ। ପୂଜାରା ୨୬୬ ବଲ୍ରୁ ୧୭ଟି ଚୌକା ସହ ୧୩୧ ରନ୍କରି ଅପରାଜିତ ରହିଥିଲେ। ବିନୟ କୁମାର ୩ଟି ୱିକେଟ ନେଇଥିଲେ।
