ସମ୍ବଲପୁର: ସମ୍ବଲପୁରର ଧନୁପାଲି ଠାରେ ଓଡିଶା ମୋଟର ଚାଳକ ସଂଘ, ଓଡିଶା ଡ୍ରାଇଭର ମହାସଂଘ ଓ ଅଲ ଓଡିଶା ପରିବହନ ଚାଳକ ସଂଘର ରାଜ୍ୟ ପଦାଧିକାରୀ ମାନଙ୍କ ସର୍ବ ସମ୍ମତି କ୍ରମେ ‘ଓଡିଶା ଡ୍ରାଇଭର ଏକତା ମହାମଞ୍ଚ’ ନାମରେ ଏକ ରାଜ୍ୟସ୍ତରୀୟ ସଙ୍ଗଠନ ଗଠନ ହୋଇଯାଇଛି । ଶୁକ୍ରବାର ଅପରାହ୍ଣରେ ଆୟୋଜିତ ସଙ୍ଗଠନ ମାନଙ୍କର ମିଳିତ ବୈଠକ ପରେ ମହାମଞ୍ଚ ପକ୍ଷରୁ ବିଭିନ୍ନ ପ୍ରସ୍ତାବ ଗୃହିତ କରାଯାଇଛି ।
ସାମାଜିକ ଗଣମାଧ୍ୟମରେ ଅନ୍ୟ ସଙ୍ଗଠନ ପ୍ରତି କୌଣସି ପ୍ରକାରର କଟୁ ମନ୍ତବ୍ୟ ପ୍ରଦାନ ନ କରିବା, ନିୟମ ଉଲ୍ଲଂଘନ କଲେ ସମାଧାନ ପାଇଁ ପଦାଧିକାରୀ ମାନେ ଉପଯୁକ୍ତ ପଦକ୍ଷେପ ନେବା, ଦାୟିତ୍ୱ ଗ୍ରହଣ କରିଥିବା ମହାମଞ୍ଚର ପଦାଧିକାରୀ ମାନେ ଓଡିଶାର ସମସ୍ତ ଡ୍ରାଇଭର ମାନଙ୍କୁ ଏକତ୍ର କରି ଗୋଟିଏ ଲକ୍ଷ୍ୟ ରଖି ଉନ୍ନତି ଓ ହିତ ଉଦ୍ଦେଶ୍ୟରେ କାର୍ଯ୍ୟ କରିବେ, ଡ୍ରାଇଭର ମାନଙ୍କର ଅଧିକାର ଓ ସୁରକ୍ଷା ଦିଗରେ ସରକାରଙ୍କ ନିକଟରେ ଉପଯୁକ୍ତ ଦାବି ଉପସ୍ଥାପନ କରିବେ ବୋଲି ପ୍ରସ୍ତାବ ଗ୍ରହଣ କରାଯାଇଛି ।
ମହାମଞ୍ଚର ପଦାଧିକାରୀ ରୂପେ ଓଡିଶା ଡ୍ରାଇଭର ମହାସଂଘରୁ ପ୍ରଶାନ୍ତ ମେଣ୍ଡୁଲୀ, ଓଡିଶା ମୋଟର ଚାଳକ ସଂଘରୁ ପ୍ରଭାକର ମଲ୍ଲିକ ଏବଂ ଅଲ ଓଡିଶା ପରିବହନ ଚାଳକ ସଂଘରୁ ଦୀପକ କୁମାର ନାୟକଙ୍କୁ ନିଯୁକ୍ତ କରାଯାଇଛି । କାର୍ଯ୍ୟକ୍ରମରେ ଶ୍ରୀଧର ବେଲାଲ ସେନ, ଚୈତନ୍ୟ, ଘନଶ୍ୟାମ, ଆଦିତ୍ୟ ସୁମନ, ଜୟ ନାରାୟଣଙ୍କ ସମେତ ସବୁ ସଂଘର ସଦସ୍ୟ ମାନେ ଉପସ୍ଥିତ ରହିଥିଲେ ।
Comments are closed.