ସାକ୍ଷୀଗୋପାଳ: ସତ୍ୟବାଦୀ ଥାନା ଅନ୍ତର୍ଗତ ପୁରୀ ଭୁବନେଶ୍ୱର ଜାତୀୟ ରାଜପଥର ବୀର ଗୋବିନ୍ଦପୁର ଛକ ନିକଟରେ ଆଜି ଅପରାହ୍ଣ ପ୍ରାୟ ୩ଟା ସମୟରେ ଏକ ଦୁର୍ଘଟଣା ଘଟିଥିଲା। ଏହି ଦୁର୍ଘଟଣାରେ ଜଣେ ମୃତ୍ୟୁ ବରଣ କରିଛନ୍ତି। ଆଉ ଜଣେ ଗୁରୁତର ଆହତ ହୋଇଛନ୍ତି। ପୁରୀ ଟାଉନ ଥାନା ଅନ୍ତର୍ଗତ ତିଆଡ଼ି ସାହି ୮ ନମ୍ବର ୱାର୍ଡର ପୂର୍ବତନ କାଉନସିଲର ରଞ୍ଜୁବାଳା ପଟ୍ଟନାୟକ ଓ ତାଙ୍କ ପୁଅ ସୋନୁ ପଟ୍ଟନାୟକ ଏକ ମୋଟର ସାଇକେଲ ପୁରୀରୁ ପିପିଲି ଯାଉଥିଲେ। ବୀର ଗୋବିନ୍ଦ ପୁର ନିକଟରେ ପଛରୁ ଆସୁଥିବା ଏକ ଅଜଣା ଗାଡ଼ି ତାଙ୍କୁ ଧକ୍କା ଦେଇ ଚାଲି ଯାଇଥିଲା, ରେଣୁବାଳା ପଟ୍ଟନାୟକ ଏବଂ ତାଙ୍କ ପୁଅ ସୋନୁ ପଟ୍ଟନାୟକ ବାଇକ୍ ସହ ରାଜପଥ ଉପରେ ଛିଟିକି ପଡ଼ି ଗୁରୁତର ଆହତ ହୋଇଥିଲେ। ସ୍ଥାନୀୟ ଲୋକଙ୍କ ସହଯୋଗରେ ଆହତ ଦୁହିଁଙ୍କୁ ସତ୍ୟବାଦୀ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା। କାର୍ୟ୍ୟରତ ଡାକ୍ତର ରେଣୁବାଳା ପଟ୍ଟନାୟକଙ୍କୁ ମୃତ ଘୋଷଣା କରିଥିଲେ। ଆହତ ସୋନୁ ପଟ୍ଟନାୟକଙ୍କ ଅବସ୍ଥା ଗୁରୁତର ଥିବାରୁ ଅଧିକ ଚିକିତ୍ସା ନିମନ୍ତେ ତାଙ୍କୁ ଭୁବନେଶ୍ୱର ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। ଖବର ପାଇ ସତ୍ୟବାଦୀ ପୁଲିସ ମେଡିକାଲରେ ପହଞ୍ଚି ମୃତଦେହକୁ ଜବତ କରିବା ସହ ବ୍ୟବଚ୍ଛେଦ ନିମନ୍ତେ ପୁରୀ ଜିଲା ମୁଖ୍ୟ ଚିକିତ୍ସାଳୟକୁ ପଠାଇଛନ୍ତି। ଦୁର୍ଘଟଣାଗ୍ରସ୍ତ ମୋଟର ସାଇକେଲଟିକୁ ଜବତ କରିଛନ୍ତି।
Comments are closed.