ତିରୁଅନନ୍ତପୁରମ : କୁଖ୍ୟାତ ଆତଙ୍କବାଦୀ ସଂଗଠନ ଆଇଏସ୍ଆଇଏସ୍ରେ କେରଳର ୧୫ ଜଣ ଯୁବକଙ୍କୁ ନିଯୁକ୍ତି ଦେଇଥିବା ଅଭିଯୋଗରେ କୋଚିସ୍ଥିତ ଏନ୍ଆଇଏ (ଜାତୀୟ ତଦନ୍ତକାରୀ ସଂସ୍ଥା) ଅଦାଲତ ଶନିବାର ବିହାର ବାସିନ୍ଦା ଯସ୍ମିନ ମହମ୍ମଦ ନାମ୍ନୀ ଜଣେ ମହିଳାଙ୍କୁ ୭ ବର୍ଷ କାରାଦଣ୍ଡାଦେଶ ପ୍ରଦାନ କରିଛନ୍ତି। ଯସ୍ମିନ ଦୀର୍ଘ ବର୍ଷ ଧରି ଆଇଏସ୍ ସଂଗଠନ ସହ ସମ୍ପର୍କ ସ୍ଥାପନ କରିଥିବାବେଳେ ଭାରତୀୟ ଯୁବକଙ୍କୁ ପ୍ରଲୋଭିତ କରି ଆଫଗାନିସ୍ତାନ ପଠାଇଥିବା ଅଭିଯୋଗ ହୋଇଥିଲା। ୨୦୧୬ ଜୁଲାଇରେ ଆଫଗାନିସ୍ତାନ ଯିବାକୁ ଉଦ୍ୟମ କରୁଥିବାବେଳେ କେରଳ ପୁଲିସ ଯସ୍ମିନ ଓ ତାଙ୍କ ପୁଅକୁ ଦିଲ୍ଲୀ ବିମାନବନ୍ଦରରୁ ଗିରଫ କରିଥିଲା। ଯସ୍ମିନଙ୍କ ସ୍ୱାମୀ ରାସି ଅବଦୁଲ୍ଲା ୨୦୧୬ ମେ’ରେ ଆଇଏସ୍ ସଂଗଠନରେ ଯୋଗଦେବାକୁ ଆଫଗାନିସ୍ତାନ ପଳାଇଥିଲା ବୋଲି ପୁଲିସ ସୂତ୍ରରୁ ଜଣାପଡିଛି। କେରଳରେ ଆଇଏସ୍ ସଂଗଠନର ସଂଖ୍ୟାଧିକ ସମର୍ଥକ ଥିବାବେଳେ ଯସ୍ମିନ ଏହାର ଫାଇଦା ଉଠାଇ ୧୫ ଜଣ ଯୁବକଙ୍କୁ ସଂଗଠନରେ ନିଯୁକ୍ତି ଦେବାରେ ସଫଳ ହୋଇଥିଲା। ଯସ୍ମିନ ପ୍ରଥମେ ଏକ ସ୍କୁଲରେ ଶିକ୍ଷୟିତ୍ରୀଭାବେ କାର୍ଯ୍ୟ କରୁଥିଲା। ତେବେ ରାସିକୁ ବିବାହ କରିବାପରେ ସେ ଆଇଏସ୍ ସଂଗଠନ ସହ ପ୍ରତ୍ୟକ୍ଷଭାବେ ଜଡିତ ହୋଇଥିଲା। ଏନଆଇଏ ପକ୍ଷରୁ ଅବଦୁଲ ରସିଦ ନାମକ ଅନ୍ୟ ଜଣେ ବ୍ୟକ୍ତିଙ୍କ ନାମରେ ଅଭିଯୋଗଫର୍ଦ୍ଦ ଦାଖଲ କରିଛି। ରସିଦ ଏହି ରାକେଟର ମୁଖ୍ୟ ଖଳନାୟକ ବୋଲି କୁହାଯାଉଛି।
Popular Categories
Previous article
Next article