ସୁରକ୍ଷା କଡ଼ାକଡ଼ି, ନକଲ କଲେ ମାମଲା
ଭୁବନେଶ୍ୱର : ଆଜିଠୁ ଆରମ୍ଭ ହେଉଛି +୨ ଥିଓରୀ ପରୀକ୍ଷା। ଏଥିପାଇଁ ଛାତ୍ରଛାତ୍ରୀ, ପରୀକ୍ଷକ ଓ ସ୍କ୍ୱାଡ୍ ସାଙ୍ଗକୁ ଜିଲା ଓ ପୁଲିସ ପ୍ରଶାସନ ପ୍ରସ୍ତୁତ। କପି ରୋକିବା, ଅଘଟଣ ଏଡ଼ାଇବା ଏବଂ ଶାନ୍ତିଶୃଙ୍ଖଳା ସହ +୨ ପରୀକ୍ଷା କରାଇବା ନେଇ ସ୍ୱତନ୍ତ୍ର ଯୋଜନା କରାଯାଇଛି। ଗତବର୍ଷ ଯେଭଳି ଗୋଟିଏ ପ୍ରଶ୍ନପତ୍ର ପ୍ୟାକେଟ୍ରୁ ଅନ୍ୟ ଏକ ପ୍ରଶ୍ନପତ୍ର ବାହାରିଲା ସେଥିପ୍ରତି ମଧ୍ୟ ଦୃଷ୍ଟି ଦିଆଯାଇଛି। ଛାତ୍ରଛାତ୍ରୀ କପି କରି ଧରାପଡ଼ିଲେ, ପରୀକ୍ଷକ ଓ ସ୍କ୍ୱାଡ ଅସାଧୁ ଉପାୟ ଅବଲମ୍ବନ ଓ କାର୍ଯ୍ୟରେ ଅବହେଳା ପ୍ରଦର୍ଶନ କଲେ ଥାନାରେ ମାମଲା ରୁଜୁ ହେବ ଏବଂ ଶିକ୍ଷା ଆଇନ ଅନୁସାରେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଓ ଦଣ୍ଡବିଧାନ କରାଯିବ। ଉଚ୍ଚ ମାଧ୍ୟମିକ ଶିକ୍ଷା ପରିଷଦ (ସିଏଚ୍ଏସ୍ଇ) ପକ୍ଷରୁ +୨ କଳା, ବାଣିଜ୍ୟ, ବିଜ୍ଞାନ ଓ ଧନ୍ଦାମୂଳକ ଥିଓରୀ ପରୀକ୍ଷା ପାଇଁ ୧୧୦୪ କେନ୍ଦ୍ର କରାଯାଇଛି। ୧୫୩୯ ଜୁନିୟର କଲେଜ ଓ ଉଚ୍ଚ ମାଧ୍ୟମିକ ସ୍କୁଲର ୩,୬୫,୮୨୬ ଛାତ୍ରଛାତ୍ରୀ ମାର୍ଚ୍ଚ ୬ରୁ୨୯ ପର୍ଯ୍ୟନ୍ତ ଥିଓରୀ ପରୀକ୍ଷା ଦେବେ। ଚଳିତ ବର୍ଷ +୨ କଳାରେ ୨,୩୩,୯୯୮, ବିଜ୍ଞାନରେ ୯୬,୧୭୫, ବାଣିଜ୍ୟରେ୨୭,୪୪୭ ଓ ଧନ୍ଦାମୂଳକ ଶିକ୍ଷା ପାଠ୍ୟକ୍ରମରେ ୮,୨୨୬ ଜଣ ପରୀକ୍ଷାର୍ଥୀ ରହିଛନ୍ତି। ଛାତ୍ରଛାତ୍ରୀ ପରୀକ୍ଷା କେନ୍ଦ୍ରରେ ସକାଳ ୯.୩୦ସୁଦ୍ଧା ରିପୋର୍ଟିଂ କରିବେ। ଉତ୍ତରଖାତା ସକାଳ ୯.୪୫ରେ ଦିଆଯିବ। ୧୦ଟାରେ ଛାତ୍ରଛାତ୍ରୀଙ୍କୁ ପ୍ରଶ୍ନପତ୍ର ପ୍ରଦାନ କରାଯିବ ଓ ଏହାପରେ ଛାତ୍ରଛାତ୍ରୀ ପ୍ରଶ୍ନଗୁଡ଼ିକର ଉତ୍ତର ଲେଖିପାରିବେ ବୋଲି ଉପପରୀକ୍ଷା ନିୟନ୍ତ୍ରକ ପ୍ରବୋଧ କୁମାର ପଣ୍ଡା କହିଛନ୍ତି। +୨ ଥିଓରି ପରୀକ୍ଷା ମାର୍ଚ୍ଚ ୬ରୁ୨୯ ପର୍ଯ୍ୟନ୍ତ ଅନୁଷ୍ଠିତ ହେବ।
