ରେଙ୍ଗାଲି: ଦୈନିକ ସମାଜରେ କିଛିଦିନ ତଳେ ‘ବିପଦ ଜନକ ସ୍ଥିତି ରେ ଚହୁକି ପୋଲ’ ଶୀର୍ଷକ ଖବର ପ୍ରକାଶିତ ହୋଇଥିଲା। ଖବର ପ୍ରକାଶିତ ହେଲା ପରେ ପୂର୍ତ୍ତ ବିଭାଗ ପକ୍ଷରୁ ତତ୍ପରତା ପ୍ରକାଶ ପାଇଥିବା ଦେଖିବାକୁ ମିଳିଛି। ପୋଲ ଉପରେ ଦେଖା ଦେଇଥିବା ଗାଡ ଖାଲ ମରାମତି କରାଯାଇ ଥିବା ବେଳେ ପୋଲକୁ ସଂଯୋଗ କରୁଥିବା ଏପ୍ରୋଚ୍ ରାସ୍ତା ଉପରେ ଥିବା ଗାଡିଆ ଭଲି ଖାଲଖମାର ମଧ୍ୟ ମରାମତି କରାଯାଇଛି। ଇତି ମଧ୍ୟରେ ଜିଲ୍ଲା ପରିଷଦ ସଭ୍ୟ ଦେନାରାୟଣ ତିୱାରୀ ଜିଲ୍ଲାପାଳଙ୍କୁ ସାକ୍ଷାତ କରି ପୋଲ ପୁନଃ ନିର୍ମାଣ କାମ ଶୀଘ୍ର ଆରମ୍ଭ କରିବାକୁ ଦାବୀ କରିଥିବାର ଜଣାପଡିଛି।
ଏହି ପୋଲର ପୁନଃ ନିର୍ମାଣ ସକାଶେ ଡାଇଭର୍ସନ ରାସ୍ତା ତିଆରି କରାଯାଇ ଥିଲେ ମଧ୍ୟ କିଛି ଦିନ ଆଗରୁ ଡାଇଭର୍ସନ ରାସ୍ତାକୁ ମେସିନ ଲଗାଇ କାଟି ଦିଆଯାଇଥିଲା। ପୂର୍ତ୍ତ ବିଭାଗର ଏଭଲି ଟାଳଟୁଳ ନୀତି ଯୋଗୁଁ ପୋଲ ପୁନଃନିର୍ମାଣ କାମ ଆରମ୍ଭ ହୋଇ ନଥିବାରୁ ଜନସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ସ୍ବାଧିନତା ସଂଗ୍ରାମରର ମୁକ ସାକ୍ଷୀ କୁହାଯାଉଥିବା ଏହି ରାସ୍ତା ଅବିଭକ୍ତ ସମ୍ବଲପୁର ଜିଲ୍ଲାର ସର୍ବ ପୁରାତନ ରାସ୍ତା ଅଟେ। ଇଂରେଜ ଅମଳରୁ ନିର୍ମିତ ଏହି ରାସ୍ତା ସମ୍ବଲପୁରରୁ ରାଞ୍ଚିକୁ ସଂଯୋଗ କରୁଛି।
Comments are closed.