ଜୟପୁର: ରାଜସ୍ଥାନର ଏକ ଗୁଜ୍ଜର ପରିବାର ପାଇଁ ଦୀପାବଳି ଆଣିଛି ବରଦାନ। ପରିବାରର ବୟୋଜ୍ୟେଷ୍ଠ ୯୫ ବର୍ଷୀୟ ବୃଦ୍ଧ ମୃତ୍ୟୁଶଯ୍ୟାରେ ପୁଣି ଜୀବଦାନ ପାଇ ଉଠି ବସିଛନ୍ତି। ଏଭଳି ଅଦ୍ଭୁତ ଓ ଆଶ୍ଚର୍ଯ୍ୟ ଓ ଦୈବୀଲୀଳାର ଉଦାହରଣ ଦେଖିôବାକୁ ମିଳିଛି ରାଜସ୍ଥାନର କ୍ଷେତ୍ରୀ ତହସିଲ୍ ଅନ୍ତର୍ଗତ ଝୁନଝୁନୁ ଜିଲାରେ।
ଗ୍ରାମର ବୁଦ୍ଧ ରାମ ଗୁଜ୍ଜର ଗତ ଶନିବାର ହଠାତ୍ ବେହୋସ ହୋଇଯାଇଥିଲେ। ସ୍ୱାସ୍ଥ୍ୟ ପରୀକ୍ଷା କରିବା ପରେ ତାଙ୍କୁ ଡାକ୍ତର ମୃତ ଘୋଷଣା କରିଥିଲେ। ଏହାପରେ ତାଙ୍କ ପରିବାର ସଦସ୍ୟମାନେ ଅନ୍ତିମ ସଂସ୍କାର ପ୍ରକ୍ରିୟା ଆରମ୍ଭ କରିଦେଇଥିଲେ। ଗୁଜ୍ଜର ପରିବାରର ପ୍ରଥା ଅନୁଯାୟୀ ଘରର ସଦସ୍ୟମାନେ ମୁଣ୍ଡନ ହେବା ପରେ ବୁଦ୍ଧରାମଙ୍କୁ ଗାଧୋଇବା ପାଇଁ ନିଆଯାଇଥିଲା। ମାତ୍ର ତାଙ୍କ ଉପରେ ପାଣି ଢାଳିବା ପରେ ତାଙ୍କ ଶରୀରରେ ହଠାତ୍ କମ୍ପନ ସୃଷ୍ଟି ହୋଇଥିଲା। କିଛି ସମୟ ପରେ ସେ ହଠାତ୍ ଉଠି ବସିଥିଲେ। ଏଭଳି ଘଟଣା ପରେ ପରିବାର ଲୋକେ ଆଶ୍ଚର୍ଯ୍ୟ ହୋଇଯାଇଥିଲେ। ଛାତି ଯନ୍ତ୍ରଣା ଯୋଗୁଁ ସେ ଶୋଇପଡ଼ିଥିଲେ ବୋଲି ବୁଦ୍ଧରାମ କହିଛନ୍ତି। ଏଭଳି ଘଟଣା ତାଙ୍କ ପରିବାର ପାଇଁ ଦୀପାବଳି ଉପହାର ବୋଲି ବୁଦ୍ଧରାମଙ୍କ ବଡ଼ ପୁଅ ବାଲୁ ରାମ କହିଛନ୍ତି।
