ନୂଆଦିଲ୍ଲୀ : ଅଯୋଧ୍ୟା ମାମଲାରେ କୋର୍ଟ ମନ୍ଦିର ସପକ୍ଷରେ ରାୟ ନ ଦେଲେ ସିରିଆ ପରି ଭାରତରେ ମଧ୍ୟ ରକ୍ତପାତ ହେବ ବୋଲି କହି ଆଧ୍ୟାତ୍ମିକ ଗୁରୁ ଶ୍ରୀ ଶ୍ରୀ ରବିଶଙ୍କର ବିବାଦୀୟ ହୋଇପଡିଛନ୍ତି। ଏଭଳି ମନ୍ତବ୍ୟ ଲାଗି ତାଙ୍କୁ ଶିବସେନା ଏବଂ ସର୍ବଭାରତୀୟ ମଜଲିସ-ଇ-ଇତ୍ତେହାଦ-ଉଲ୍ ମୁସଲିମିନ୍ (ଏଆଇଏମ୍ଆଇଏମ୍) ମୁଖ୍ୟ ଅସଦୁଦ୍ଦିନ୍ ଓୱେସି କଡ଼ା ସମାଲୋଚନା କରିଛନ୍ତି। ରବିଶଙ୍କର ଏଭଳି ମନ୍ତବ୍ୟ ଦେଇ ପରୋକ୍ଷରେ ଧମକ ଦେଇଛନ୍ତି। ଏହି ମାମଲା ବିଚାରାଧିନ ଥିବା ବେଳେ କେଉଁ ଉଦ୍ଦେଶ୍ୟ ନେଇ ରବିଶଙ୍କର ଏଭଳି ମନ୍ତବ୍ୟ ଦେଇଛନ୍ତି ବୋଲି ଓୱେସି ପ୍ରଶ୍ନ କରିଛନ୍ତି। ଏହାଦ୍ୱାରା ସେ ଅଦାଲତ ଅବମାନନା କରିଛନ୍ତି। ଏଣୁ ତାଙ୍କୁ ଗିରଫ କରାଯିବା ଉଚିତ। ଏଥିସହ ଏହି ମାମଲାର ଶୁଣାଣି ୨୦୧୯ ଲୋକସଭା ନିର୍ବାଚନ ପରେ ହିଁ କରାଯିବା ଉଚିତ ବୋଲି ଓୱେସି ମତ ଦେଇଛନ୍ତି। ମାର୍ଚ୍ଚ ୧୪ରେ ଏହି ମାମଲାର ଶୁଣାଣି ପୂର୍ବରୁ ରବିଶଙ୍କର ଉଦ୍ଦେଶ୍ୟମୂଳକ ଭାବେ ଏଭଳି ମନ୍ତବ୍ୟ ଦେଇଥିବା ଓୱେସି ଅଭିଯୋଗ କରିଛନ୍ତି। ଅନ୍ୟପକ୍ଷରେ ଶିବସେନା ପକ୍ଷରୁ ଏହାର ମୁଖପତ୍ର ‘ସାମନ୍ନା’ରେ ରବିଶଙ୍କରଙ୍କୁ ସମାଲୋଚନା କରାଯାଇଛି। ଏଭଳି ମନ୍ତବ୍ୟ ଦେଇ ରବିଶଙ୍କର ଲୋକଙ୍କ ମଧ୍ୟରେ ଆତଙ୍କସୃଷ୍ଟି କରିବାକୁ ଉଦ୍ୟମ କରିଛନ୍ତି। ଆଇଏସ୍ଆଇଏସ୍ଆଇ ସହିତ ରମମନ୍ଦିର ପ୍ରସଙ୍ଗକୁ ଯୋଡି ସେ ବିତର୍କକୁ ପ୍ରଶ୍ରୟ ଦେଇଛନ୍ତି। ଏହାର ତଦନ୍ତ ହେବା ଆବଶ୍ୟକ। ଜଣେ ଆଧ୍ୟାତ୍ମିକ ଗୁରୁ ଏଭଳି ମନ୍ତବ୍ୟ ଦେବା ଶୋଭା ପାଏ ନାହିଁ ବୋଲି ‘ସାମନ୍ନା’ରେ ଉଲ୍ଲେଖ କରାଯାଇଛି। ରବିଶଙ୍କର କହିଥିଲେ, କୋର୍ଟ ମନ୍ଦିର ନିର୍ମାଣ ସପକ୍ଷରେ ରାୟ ନ ଦେଲେ ରକ୍ତପାତ ହେବ। ସଂଖ୍ୟାଗରିଷ୍ଠ ହିନ୍ଦୁ ମୁସଲମାନଙ୍କ ବିରୋଧରେ ମନରେ ଆକ୍ରୋଶ ରଖିବେ। ତେବେ ଇସ୍ଲାମ ଅନୁଯାୟୀ କୌଣସି ବିବାଦୀୟ ସ୍ଥାନରେ ମୁସଲମାନ ନମାଜ ପାଠ କରିପାରିବେ ନାହିଁ। ଏଣୁ ସେମାନେ ଅଯୋଧ୍ୟାରେ ମସ୍ଜିଦ ନିର୍ମାଣ କରିପାରିବେ ନାହିଁ। ଏହିପ୍ରକାରେ ପ୍ରତ୍ୟେକଙ୍କ ବିଜୟ ହେବ ବୋଲି ସେ ଦର୍ଶାଇଥିଲେ।
Popular Categories
Previous article
Next article