ନୂଆଦିଲ୍ଲୀ : ରିଲାଏନ୍ସ ଇଣ୍ଡଷ୍ଟ୍ରିଜ୍ ଅଧ୍ୟକ୍ଷ ମୁକେଶ ଅମ୍ବାନୀ ଚଳିତବର୍ଷ ମଧ୍ୟ ସବୁଠାରୁ ଧନୀ ଭାରତୀୟ ଭାବେ ନିଜ ସ୍ଥାନ ବଜାୟ ରଖିଛନ୍ତି। ସେ ଫୋର୍ବସର ଧନୀ ବ୍ୟକ୍ତିଙ୍କ ତାଲିକାରେ ୧୯ତମ ସ୍ଥାନକୁ ଉନ୍ନତି ହୋଇଛନ୍ତି। ତାଙ୍କ ସମ୍ପତ୍ତି ପରିମାଣ ୧୬.୯ ବିଲିୟନ୍ ଡଲାର ବୃଦ୍ଧି ପାଇ ୪୦.୧ ବିଲିୟନ୍ ଡଲାରରେ ପହଞ୍ଚିଛି। ଗତବର୍ଷ ୨୩.୨ ବିଲିୟନ୍ ଡଲାର ମୂଲ୍ୟର ସମ୍ପତ୍ତି ସହିତ ସେ ତାଲିକାର ୩୩ ତମ ସ୍ଥାନରେ ଥିଲେ। ୱିପ୍ରୋ ମାଲିକ ଆଜୀମ୍ ପ୍ରେମ୍ଜୀ ୧୮.୮ ବିଲିୟନ ଡଲାର ସମ୍ପତ୍ତି ସହିତ ଚଳିତବର୍ଷ ଏହି ତାଲିକାରେ ୫୮ତମ ସ୍ଥାନକୁ ଉନ୍ନିତ ହୋଇଛନ୍ତି। ଏଥିସହ ସେ ଦ୍ୱିତୀୟ ଧନୀ ଭାରତୀୟ ହେବାର ଗୌରବ ଲାଭ କରିଛନ୍ତି। ଗତବର୍ଷ ସେ ୧୪.୯ ବିଲିୟନ ଡଲାର ସହିତ ତାଲିକାର ୭୨ ତମ ସ୍ଥାନରେ ଥିଲେ।
ଜିନ୍ଦଲ ଇସ୍ପାତ୍ ଏବଂ ଶକ୍ତି କମ୍ପାନୀର ସାବିତ୍ରୀ ଜିନ୍ଦଲ ୮.୮ ବିଲିୟନ ଡଲାର ସହିତ ଫୋର୍ବସ ତାଲିକାରେ ୧୭୬ ତମ ସ୍ଥାନରେ ରହିଥିଲେ ମଧ୍ୟ ତାଙ୍କୁ ସବୁଠାରୁ ଧନୀ ଭାରତୀୟ ମହିଳା ମାନ୍ୟତା ମିଳିଛି। ବାୟୋଟେକ୍ ଉଦ୍ୟୋଗପତି କୀରଣ ମଜୁମ୍ଦାର-ଶା ୩.୬ ବିଲିୟନ ଡଲାର ସହିତ ଫୋର୍ବସ ତାଲିକାର ୬୨୯ତମ ସ୍ଥାନରେ ରହିଛନ୍ତି। ଫାଇନାନ୍ସିଆଲ୍ ଟେକ୍ନୋଲୋଜି ଉଦ୍ୟୋଗପତି ବିଜୟ ଶେଖର ଶର୍ମା (୩୯) ସର୍ବକନିଷ୍ଠ ଧନୀ ଭାରତୀୟ ଭାବେ ଫୋର୍ବସ ତାଲିକାରେ ୧,୩୯୪ତମ ସ୍ଥାନରେ ରହିଛନ୍ତି। ଫୋର୍ବସର ଏହି ବାର୍ଷିକ ତାଲିକାରେ ବିଶ୍ୱର ମୋଟ ୨୨୦୮ ଧନୀ ବ୍ୟକ୍ତିଙ୍କର ନାମ ରହିଛି। ଏମାନଙ୍କ ମଧ୍ୟରୁ ୧୨୧ ଜଣ ଭାରତୀୟ କୋଟିପତି। ଗତବର୍ଷ ତୁଳନାରେ ଚଳିତବର୍ଷ ଏହି ତାଲିକାରେ ୧୯ ଜଣ ଅଧିକ ଧନୀ ଭାରତୀୟଙ୍କ ନାମ ସ୍ଥାନ ପାଇଛି। କୋଟିପତିଙ୍କ ସଂଖ୍ୟା ଦୃଷ୍ଟିରୁ ଭାରତ ବିଶ୍ୱର ତୃତୀୟ ରାଷ୍ଟ୍ର ହୋଇଥିବା ବେଳେ ୫୮୫ ଜଣ କୋଟିପତି ବ୍ୟକ୍ତିଙ୍କ ସହ ଆମେରିକା ପ୍ରଥମ ଏବଂ ୩୭୩ ଜଣ କୋଟିପତି ବ୍ୟକ୍ତିଙ୍କୁ ନେଇ ଚୀନ୍ ଦ୍ୱିତୀୟ ସ୍ଥାନରେ ରହିଛି।
