ଡେସ୍କ: ରାଜ୍ୟସଭାରେ ଖାଲି ହେବାକୁ ଯାଉଥିବା ୫୭ଟି ଆସନ ପାଇଁ ଆସନ୍ତା ଜୁନ୍ ୧୦ରେ ଭୋଟ୍ ଗ୍ରହଣ ହେବ। ଏଥିରେ ଓଡ଼ିଶାରୁ ଖାଲି ହେବାକୁ ଥିବା ୩ଟି ଆସନ ପାଇଁ ମଧ୍ୟ ଭୋଟ ହେବ। ସାଂସଦ ଏନ ଭାସ୍କର ରାଓ, ସସ୍ମିତ ପାତ୍ର ଓ ପ୍ରସନ୍ନ ଆଚାର୍ଯ୍ୟଙ୍କ କାର୍ଯ୍ୟକାଳ ଆସନ୍ତା ଜୁଲାଇ ୧ ତାରିଖରେ ଶେଷ ହେବାକୁ ଯାଉଛି। ଗୁରୁବାର ନିର୍ବାଚନ ଆୟୋଗଙ୍କ ପକ୍ଷରୁ ଏ ନେଇ ସୂଚନା ପ୍ରକାଶ ପାଇଛି।
ବିଜ୍ଞପ୍ତି ଅନୁଯାୟୀ ଦେଶର ୧୫ଟି ରାଜ୍ୟର ୫୭ ଜଣ ସାଂସଦଙ୍କ କାର୍ଯ୍ୟକାଳ ଶେଷ ହେବ। ଯେଉଁ ସଦସ୍ୟଙ୍କ କାର୍ଯ୍ୟକାଳ ୨୦୨୨ ଜୁନ ୨୧ରୁ ଅଗଷ୍ଟ ୧ ମଧ୍ୟରେ ସରିବାକୁ ଯାଉଛି, ସେହି ସବୁ ଆସନ ପାଇଁ ଜୁନ୍ ୧୦ରେ ଭୋଟ ହେବ। ଏଥିପାଇଁ ଆସନ୍ତା ୨୪ ତାରିଖରେ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇବ। ନାମାଙ୍କନ ଦାଖଲର ଶେଷ ତାରିଖ ୩୧ ମେ’ ରହିଥିବା ବେଳେ ଜୁନ୍ ୧ରେ ନାମାଙ୍କନ ପତ୍ର ଯାଂଚ ହେବ। ନାମାଙ୍କନ ପ୍ରତ୍ୟାହ୍ୟାରର ଶେଷ ତାରିଖ ଜୁନ ୩ ଓ ଜୁନ୍ ୧୦ରେ ଭୋଟ ହେବ।ଭୋଟ ଗ୍ରହଣ ସକାଳ ୯ଟାରୁ ଆରମ୍ଭ ହୋଇ ୪ଟା ପର୍ଯ୍ୟନ୍ତ ଚାଲିବ। ସେହିଦିନ ସନ୍ଧ୍ୟା ୫ଟାରୁ ଗଣତି ଆରମ୍ଭ ହେବ। ଜୁନ୍ ୧୩ ତାରିଖ ସୁଦ୍ଧା ସମସ୍ତ ପ୍ରକାରର ନିର୍ବାଚନ ପ୍ରକ୍ରିୟା ଶେଷ କରାଯିବ ବୋଲି ବିଜ୍ଞପ୍ତିରେ ଉଲ୍ଲେଖ ରହିଛି।
ଏହି ପର୍ଯ୍ୟାୟରେ ଉତ୍ତରପ୍ରଦେଶର ୧୧ଟି, ତାମିଲନାଡୁ ଓ ମହାରାଷ୍ଟ୍ରରେ ୬ଟି ଲେଖାଏଁ, ଆନ୍ଧ୍ର ପ୍ରଦେଶର ୪ଟି, ତେଲେଙ୍ଗାନାର ୨ଟି, ଛତିଶଗଡ଼଼ର ୨ଟି, ମଧ୍ୟପ୍ରଦେଶର ୩ଟି, କର୍ଣ୍ଣାଟକର ୩ଟି, ଓଡ଼ିଶାର ୩ଟି, ପଞ୍ଜାବର ୨ଟି, ରାଜସ୍ଥାନର ୪ଟି, ଉତରାଖଣ୍ଡର ୧ଟି, ବିହାରର ୫ଟି, ଝାଡ଼ଖଣ୍ଡର ୨ଟି ଓ ହରିୟାଣାର ୨ଟି ଆସନ ପାଇଁ ଭୋଟ ହେବ।
